Amulibikkile Mbaakani Zyakumuuya
1 Elo kaka ciyooba coolwe citaliboteli ikutembaula Jehova mane kukabe kutamani! Kutegwa tugwasyigwe kuzuzikizya mbaakani eeyo, tulakonzya kulibikkila mbaakani zyakumuuya zimwi lino alimwi akusolekesya kuzizuzikizya. Kucita boobo kulatugwasya kubelesya nguzu zyesu munzila yabusongo. (1 Kor. 9:26) Ino nimbaakani nzi nywebo nzyomukonzya kuzuzikizya?
2 Ciiyo ca Bbaibbele: Sena mulalibambila muswaangano umwi aumwi wambungano? Ikuti naa mulacita oobu, sena mulaba aciindi cakuvwuntauzya alimwi akuzinzibala kuyeeya nomubala? Mucikozyanyo, nomulibambila Ciiyo ca Ngazi Yamulindizi cansondo ansondo alimwi a Ciiyo Cabbuku Cambungano, sena mweenga buyo bwiinguzi naa mulaalanga-langa amagwalo aatazubulwidwe alimwi akuyeeyesya kujatikizya twaambo tupedwe kubupanduluzi buliko? Sena inga mwabikka mbaakani yakuvwuntauzya twaambo tuli mbotubede nsondo ansondo kuzwa mukubala Bbaibbele mu Cikolo Camulimo Weendelezyegwaa Leza? Kuvwuntauzya kuli boobu kujatikizya zintu zyakumuuya kuyandika ciindi alimwi akusolekesya, pele kuli mpindu zitalivwulili zijanika.—Tus. 2:4, 5.
3 Miswaangano ya Mbungano: Aimbi mbaakani ijatikizya kujanika lyoonse kumiswaangano yambungano iili musanu. Kufwambaana kusika kutegwa tuyanzane abakombima alimwi akutola lubazu mukwiimba lwiimbo lwakujula amupailo kuutola ambele muuya walukamantano mumbungano. Alimwi tulakonzya kusoleka kwiingula amuswaangano umwi aumwi akusoleka kuyaambele kujatikizya mbotwiingula. Ambweni mulakonzya kwaamba mbuli lugwalo luli mumuncali mbolujatene amakani aali mukubandikwa naa kutondezya mbuli makani amwi mbwaakonzya kubelesyegwa mubuumi bwabuzuba abuzuba.—Heb. 10:24, 25.
4 Mulimo Wamumuunda: Imulimo wesu uyaambele kapati eelyo notulibikkila mbaakani. Sena mwakalibikkila mbaakani yamawoola ngomuyanda kunoobeleka mumulimo wamumuunda mwezi amwezi? Bamwi bajana kuti eeci cilagwasya kapati. Naa sena mulakonzya kuyaambele muzibeela zimwi zyamulimo wanu, mbuli kubelesya Bbaibbele mumulimo wakuŋanda aŋanda, kucita nyendo zyakupilukila zizwidilila kapati, kusolekesya kutalisya ciiyo ca Bbaibbele naa kuyiisya kabotu nomweendelezya ziiyo?
5 Nobazyali, sena muli mukubakulwaizya bana banu kuti balibikkile mbaakani mumulimo wa Jehova? Sena bakeelela kale kubeleka kabali basikumwaya? Amubagwasye kutegwa babone kuti kubeleka kabali bapainiya, kujanika ku Cikolo Cakwiiya Mulimo naa kuba umwi wacibeela camukwasyi wa Beteli ninzila iitaliboteli kapati yakutondezya kulumba kwabo kuli Jehova.—Muk. 12:1.
6 Mbotuzumanana kulanga-langa milimo yesu, kulibikkila mbaakani zyakumuuya alimwi akusolekesya kuzizuzikizya, tuyoojana lukkomano lutalivwulili mumulimo wesu alimwi tuyoobayumya-yumya bamwi.—Rom. 1:12.