Mbomukonzya Kuzizuzikizya Mbaakani Zyanu Zyakumuuya
1. Ino nimbaakani nzi bakubusi banji Banakristo nzyobajisi?
1 Mbomuli Munakristo mukubusi, mbaakani zyanu zyakumuuya zilaba akaambo kaluyando ndomujisi kuli Jehova alimwi amumajwi Jesu ngaakaambila Banakristo boonse kuti ‘basaangune kuyandaula Bwami.’ (Mt. 6:33) Mbaakani yanu ilakonzya kuba yakutola ciindi cinji mumulimo kwiinda mukubeleka kamuli mupainiya naa kuyoobelekela kubusena kubulide bakambausi ba Bwami. Ibamwi inga bayeeya kulisungula kumulimo wakuyaka, kuyoobelekela kumutabi naa kuyoobelekela kubusena bubulide. Eezi kaka nimbaakani zikkomanisya alimwi ziyandika kapati!
2. Ino ncinzi cikonzya kumugwasya kuzizuzikizya mbaakani zyanu zyakumuuya?
2 Cintu cikonzya kumugwasya kuzizuzikizya mbaakani zyanu zyakumuuya nkuzilemba apepa. Ikaambo kakuyeeyela buyo inga kalibonya akulimvwisya ciindi nomusala mabala aakukalemba buya. Aboobo, inga mwasala kuzilemba mbaakani zyanu alimwi anzila mbomukonzya kuzizuzikizya. Kuyungizya waawo, mbaakani zyaciindi cisyoonto zilakonzya kumugwasya kubona mbomuyaambele alimwi akubikkila maanu nomuzuzikizya mbaakani zyaciindi cilamfwu.
3. Amuzyaambe mbaakani zyaciindi cisyoonto zikonzya kumugwasya muntu kutegwa ayelele kubbapatizyigwa.
3 Mbaakani Zyaciindi Cisyoonto: Ikuti naa tamuna kubbapatizyigwa, amulange-lange ncomweelede kucita kutegwa mwiizuzikizye mbaakani eeyo. Inga mwayandika kuzimvwisya kabotu-kabotu njiisyo zyamu Bbaibbele zyantalisyo. Ikuti kacili boobu, ayibe mbaakani yanu yakulibala kabotu-kabotu bbuku lya Bbaibbele Ncoliyiisya akulanga-langa magwalo oonse aabikkidwe. (1 Tim. 4:15) Alimwi amulibikkile mbaakani yakulibala Bbaibbele lyoonse kuzwa ku Matalikilo kuyoosika ku Ciyubunuzyo, mbubwenya mbuli baabo babelekela ku Beteli abasicikolo ca Gilead mbobeelede kucita. Kuzwa waawo, amuzumanane kulibala Bbaibbele abuzuba. (Int. 1:2, 3) Amutelaike buyo eeco mbocikonzya kumugwasya kusima kumuuya! Lyoonse nomuyanda kutalika anomwamanizya kubala Bbaibbele, amupaile camoyo woonse kuli Jehova alimwi amubone mbomukonzya kuzibelesya nzyomwiiya.—Jak. 1:25.
4. Ino nimbaakani zyaciindi cisyoonto zili buti Munakristo uujisi mbaakani zyaciindi cilamfwu zyamulimo waku Beteli naa bumisyinali nzyanga walibikkila?
4 Ikuti naa mwakabbapatizyigwa kale, ino nimbaakani nzi azimwi nzyomukonzya kulibikkila? Sena muyandika kuyungizya luzibo lwanu mukukambauka? Mucikozyanyo, sena inga yaba mbaakani yanu yakuba abupampu mukubelesya Jwi lya Leza mumulimo wamumuunda? (2 Tim. 2:15) Mbuti mbomukonzya kutola ciindi cinji mumulimo? Amulibikkile mbaakani zyaciindi cisyoonto izyeendelana amyaka, bukkale bwanu alimwi ziyoomugwasya kuzuzikizya mbaakani zyaciindi cilamfwu.
5. Mbuti kulibikkila mbaakani zyaciindi cisyoonto mbokwakamugwasya mukwesu umwi kuzuzikizya mbaakani yakwe yakuyoobelekela ku Beteli?
5 Mbaakani Yakazwidilila: Ciindi Tony wamyaka yakuzyalwa iili 19 naakwaswaya ofesi yamutabi ya Bakamboni ba Jehova, wakaba aluyandisisyo lwakuyoobelekela ku Beteli. Nokuba boobo, bukkale bwakwe bwakali bubyaabi alimwi tanaakaninga kulyaaba kuli Leza. Tony wakacinca buumi bwakwe kutegwa bweendelane anzila zya Jehova alimwi wakaba ambaakani yakuti ayelele kubbapatizyigwa. Naakaizuzikizya mbaakani eeyo, wakalibikkila mbaakani yakucita bupainiya bwakugwasyilizya, mpoonya bwaciindi coonse alimwi wakabulemba buzuba akkalenda mbwaakali kuyanda kuyootalika. Amweezyeezye buyo mbwaakakkomana naakatambwa kuyoobelekela ku Beteli kakwiindide ciindi cili mbocibede kali mupainiya!
6. Ino ncinzi cikonzya kumugwasya kuzizuzikizya mbaakani zyanu zyakumuuya?
6 Andinywe mulakonzya kuzizuzikizya mbaakani zyanu zyakumuuya nomubikka ziyandika zya Bwami mubusena bwakusaanguna. Amuzumanane kwiipailila ‘milimo yanu’ kuli Jehova akusoleka cabupampu kwiizuzikizya.—Tus. 16:3; 21:5.