Nobakubusi—Mujisi Mbaakani Nzi Zyakumuuya?
1 Jehova ulizi mbouyandika mulimo mubotu alimwi ambaakani zikonzyeka kukuleta lukkomano. (Amubone Matalikilo 1:28; 2:15, 19.) Sunu Jehova wapa bantu bakwe mulimo wakukambauka alimwi akuyiisya. Alimwi tulijisi mbaakani ini-ini yakujana buumi butamani mu Paradaiso. Kwaciindi cino tweelede kulibikkila mbaakani zyakumuuya ziyakumbele kutegwa tutazibelesyi bubyaabi nguzu azintu zyesu.—1 Kor. 9:26.
2 Mbaakani Zibeleka Kubantu Bacili Bana: Ibakubusi beelede kubaa mbaakani zyateokrasi izinga zyakonzyeka kweelana mbuli umwi aumwi mbwakonzya. (1 Tim. 4:15) Bamwi bacili basyoonto kapati baikonzya mbaakani yakwaamba mabbuku aa Bbaibbele kabatalangi mu Bbaibbele nociba ciindi kabatana ciziba kubala. Kwiinda muciiyo camukwasyi, bana baiya kulibambila miswaangano kutegwa bakonzye mbaakani yakwaamba twaambo tugwasya alimwi akulilembya mu Cikolo ca Mulimo wa Teokrasi. Iciindi bana nobasindikila bazyali babo mumulimo wamumuunda balaiya kutola lubazu mukupa bumboni mbobayabuyaambele kumbaakani yabo yakuba basikumwaya batabbapatizidwe. Bazyali beelede kukankaizya mbaakani yakulyaaba akubbapatizigwa kubana babo basyoonto.
3 Ikuti koli mukubusi, ino mbaakani zyako zyakumuuya zibikkilizya nzi? “Koyeeya Mulengi wako” kwiinda mukubikkila maanu kumbaakani ziyandika ncobeni mubuumi. (Muk. 12:1; Int. 71:17) Sena tokonzyi kucita mulimo wabupainiya bwakugwasilizya mumyezi nomujalide zikolo? Sena kuli nookayeeyede kucita mulimo waciindi coonse koli mupainiya waciindi coonse? Ino mbuti kumakani akwiiya mulaka mupya kutegwa kumbele ukakonzye kugwasya nkamu zimwi naa mbungano zibelesya mulaka oyo mubusena bwanu naa kumbi buyo? Ibunji bwabaabo bali ku Beteli lino naa babeleka kabali balangizi beendeenda naa bamishinali bakabikka mulimo waciindi coonse waalubazu kuti ibe mbaakani yabo nobakacili kucikolo. Sena inga tociti obo mbubonya andiwe?
4 Nocili muciimo cabuniini kosoleka kwiiya cikozyanyo ca Jesu. Nociba ciindi naakali buyo amyaka iili 12 wakali kwaambaula cakulikwaya kujatikizya makani aazyakumuuya. (Lk. 2:42-49, 52) Ikulibikkila mbaakani zigwasya ikucita ciiyo cako omwini, kubala Bbaibbele abuzuba alimwi akuswaangana lyoonse a Banakristo basimide kumiswaangano alimwi amumulimo kuyookugwasya kujana luzibo lwakuyiisya bamwi kujatikizya Bwami bwa Leza mbubwena mbwaakacita Jesu.