“Amusungwaale”
1 Notwakalyaaba kuli Jehova, twakasyomezya kuti tuyakucita mbuli mbotukonzya kulinguwe. Mwaapostolo Petro cakweelela wakakulwaizya Banakristo bamumwaanda wamyaka wakusaanguna ikusungwaala mukusinizya ciimo cabo kuli Jehova. (2 Pet. 1:10) Masimpe tuyanda kusungwaala kutegwa tukkomanisye Jehova notumubelekela sunu. Ino eci cibikkilizya nzi? Mbociyaabuyumizigwa cilongwe cesu a Jehova akuzinzibala kuyeeya zyeezyo zyoonse nzyaatucitila, moyo wesu ulatukulwaizya ikubeleka mbuli mbotukonzya lyoonse mumulimo wakwe. Tuyanda kuusumpula mulimo wesu alimwi naa kakukonzyeka kuyungizya ciindi ncotubelesya.—Int. 34:8; 2 Tim. 2:15.
2 Mukwesu umwi uucili musyoonto wakali kuyanda kuyungizya ciindi ncabelesya mumulimo, wakajana kuti kwiiya Jwi lya Leza lyoonse kwakayungizya kulumba kwakwe kuli Jehova alimwi akumupa busungu bunji. Eci cakamukulwaizya kulembela mumulimo wabupainiya. Imucizi umwi wakalaa buyumuyumu kwaambaulaa bantu mbatazi wakabelesya nzila zimwi izili mubbuku lya Kukambitsirana, elyo muciindi buyo ciniini wakatalika kuzwidilila kapati mumulimo wakwe. Wakakonzya kweendelezya ciiyo ca Bbaibbele kubanabukwetene ibakazumina kasimpe.
3 Amukkomane a Zintu Nzyomukonzya Kucita: Tobamwi tulajanika mubukkale bukatazya mbuli kutapona kabotu, kukazigwa abanamukwasyi, bucete naa kutaswiililwa abantu bali mubusena motubelekela. Imapenzi aamwi manji aavwulide mumazuba aaya aakumamanino alakonzya kutusinkilila mumulimo wesu. (Lk. 21:34; 2 Tim. 3:1) Sena eci caamba kuti twaalilwa mukulyaaba kwesu kuli Jehova? Kutali notumubelekela mbuli mbotukonzya.
4 Tacili cabusongo kulinyansya akaambo kakulanga nzyobakonzya kucita bamwi. Muciindi caboobo Magwalo atukulwaizya kuti “muntu umwi aumwi alingule milimo yakwe mwini.” Ikubeleka kusikila waawo mpotukonzya swebo lwesu kulamukkomanisya Jehova alimwi kutupa “cintu cakulikankaizizya.”—Gal. 6:4; Kol. 3:23, 24.
5 Atwaatobele majwi aa Petro ‘aakusungwaala akujanwa tulikede muluumuno, katutakwe kabala, katutakwe kampenda mumeso aa-Leza.’ (2 Pet. 3:14) Muuya oyo uyootupa kulimvwa kuliiba alimwi uyootuletela luumuno kumizeezo lwalo Jehova alikke ndwapa.—Int. 4:8.