Kabbokesi Kamubuzyo
◼ Sena cileelede kuli umwi wa Bakamboni ba Jehova kusilikwa alimwi akulanganyizigwa kucibbadela naa kuŋanda iilelelwa bacembeede yeendelezyegwa ambunga yabukombi?
Imbunga zinji zyabukombi zyeendelezya zibbadela naa maanda mobalanganya bantu balwazi ambweni batabukilwi bulo. Kanji-kanji, masena aaya taapangilwi kuti agwasyilizye Babuloni Mupati. (Ciy. 18:2, 4) Kumatalikilo, imbunga yabukombi ilakonzya kuti yakabikka busena oobu kutegwa bube makwebo akujanina mali. Mazuba aano, zibbadela zimwi zijisi buyo zina lyakuti nzyacikombelo akaambo kakuti zyakapangwa acikombelo eeco, kakuli zimwi zicilanganyizigwa abasololi bacikombelo.
Ikuti umwi wa Bakamboni ba Jehova uyandika kuunka kucibbadela naa kuŋanda nkobalelela bacembeede, weelede kulisalila cakucita naa inga waunka ooko mbunga yabukombi nkoyeelede kuti njiyeendelezya. Manjezeezya aamuntu umwi alakonzya kumuzumizya kucita oobo, pele uumbi taakonzyi kumuzumizya. (1 Tim. 1:5) Kuli bukkale bumwi bukonzya kugwasya muntu kusala, aboobo inga cagwasya kubulanga-langa.
Mucikozyanyo, cibbadela naa ŋanda njobalelela bacembeede icijisi zina lyacikombelo cilakonzya kuba ncecibbadela cilikke cili afwaafwi kubusena ooko. Ambweni ikuti kakuli cibbadela cimbi afwaafwi, pele inga kwajanika kuti eeco ceendelezyegwa acikombelo cijisi bubambe bubotu bwabusilisi. Cibbadela cijisi zina lyacikombelo inga kacili cilikke buyo kubusena ooko icijisi musamu ngotuyanda naa musilisi uukonzya kusilika bulwazi oobo. Alimwi, zimwi ziindi babelesi bakuzibbadela zyeendelezyegwa acikombelo inga kabali bantu balemeka kusala kwanu kujatikizya kubelesya bulowa mbomuli Banakristo, kakuli zibbadela zimbi zyamfwulumende inga kabataciti oobo. Aboobo, ootu ntotwaambo tumwi ntomukonzya kulanga-langa nomuyanda kusala cibbadela nkomuyanda kusilikilwa.
Ikuti naa mwasala kubelesya cibbadela naa ŋanda iilelelwa bacembeede zyeendelezyegwa acikombelo, mweelede kucibona buyo kuti mubbadelela mulimo ngobamubelekela. Kulindinywe imbunga yabukombi eeyo inga mwaibona buyo kuti icita makwebo, mpoonya nywebo nomuula zintu kuli mbabo takuli kusanga mali aakugwasyilizya bukombi bwakubeja. Mubbadelela buyo cintu ncomwaula naa mulimo ngobamubelekela.
Nokuba boobo, mbomuli Banakristo, mubukkale buli boobo mweelede kuba masimpe kuti kunyina nomujatikizigwa mumilimo iili yoonse yabukombi bwakubeja. Alimwi tamweelede kubelesya mazina ngobaitana basicikombelo mbuli aakuti: “Taata” (Father) naa “Mucizi” (Sister) kubantu babeleka naa baswaya kubusena oobu. (Mt. 23:9) Mweelede kubona kuti ncomuunkila nkuko mmakani buyo aamakwebo kujatikizya busilisi kutali cintu cimbi pe.
Mwanjila mumalo kucibbadela, mweelede kufwambaana kulizyibya kuti muli umwi wa Bakamboni ba Jehova alimwi akuti muyanda kuti kamuswaigwa abaalu bambungano iili afwaafwi. Eeci ciyoopa kuti baalu kabamugwasya kumuuya ciindi nomunooli mucibbadela.—1 Tes. 5:14.
Bamumukwasyi Banakristo, baalu alimwi abambi mumbungano beelede kulanganya ziyandika zyakumuuya zyabakwesu alimwi abacizi bacembeede boonse ibakkala mumaanda mobalanganya bantu bacembeede, ikapati ikuti maanda aayo mobakkala ayendelezyegwa ambunga yabukombi. Bunkutwe mukaambo aaka buyoobakulwaizya kapati bacembeede bali boobu alimwi bayoogwasyigwa kutegwa batajatikizigwi mumiswaangano yabukombi, kusekelela mapobwe naa zintu zimwi zicitwa abusena aawa.
Itwaambo ootu tuyoomugwasya aumwi kulanga-langa bukkale boonse bujatikizidwe katanasala cibbadela ncayoobelesya naa busena nkobalanganya bacembeede mbwayoobelesya.—Gal. 6:5.