Lugwasyo Kubabelesi Bamuzibbadela Ibakopene Mumizeezo
Ba Bryn, ibakkala ku North Carolina, U.S.A., bali mu Hospital Liaison Committee, kkomiti iibelekela antoomwe azibbadela mukulanganya Bakamboni ba Jehova balwazi.
Akaambo kabulwazi bwa COVID-19, kuzibbadela zinji tiibakali kuzumizya basikuswaya. Ba Bryn bakatuma fooni kumupati-pati uubona kuti balwazi abamukwasyi wabo bapegwa lugwasyo kuzwa kuzikombelo, kutegwa babuzye mbobakali kukonzya kugwasya balwazi Bakamboni.
Pele bakacikonzya buyo kubandika asikugwasyilizya wabo. Mbwaanga tiibakali kukonzya kuzumizyigwa kuswaya balwazi, bakalomba kuti basiye namba yabo, mpoonya babapede balwazi Bakamboni boonse kutegwa kababandika ambabo. Bakakuzumina kulomba kwabo.
Kumane ba Bryn bakayeeya babelesi boonse bakuzibbadela. Bakabalumba akaambo kamulimo ngobakali kubeleka alimwi akubuzya naa bakali kupona buti. Bakayungizya kwaamba kuti bakabala kujatikizya bantu boonse, kwaambisya aabo ibabelekela kuzibbadela, mbobakakopene mumizeezo akaambo kabulwazi bwa COVID-19.
Aabo mbobakali kubandika limwi afooni bakaamba kuti ncobeni bulwazi oobu bwabayumizyila buumi aabo ibabelekela kuzibbadela akubapa kukopana mumizeezo.
Mpoonya ba Bryn bakaamba kuti: “Awebbusaiti yesu kuli makani aakonzya kugwasya bantu bakopene mumizeezo. Ikuti mwaunka a jw.org akulemba bbala lyakuti ‘kukopana,’ acibeela cakuyandaula, muyoojana zibalo zikonzya kubakulwaizya kapati mbomubeleka limwi.”
Nobakacili kwaambaula, basikugwasyilizya aabo bakaunka awebbusaiti yesu, bakalemba bbala lyakuti ‘kukopana,’ akuyandaula, mpoonya bakazibona zibalo. Bakagambwa akwaamba kuti: “Ndilabatondezya babboosi bangu. Zibalo eezyi zilabagwasya babelesima abamwi buyo. Ndilazipulinta akubapa boonse.”
Nokwakainda nsondo zisyoonto, ba Bryn bakabandika ababboosi bamubelesi uulya, balo ibakaamba kuti bakaunka awebbusaiti akuzipulinta zibalo zyakali kwaamba kujatikizya kukopana mumizeezo azimwi izyaamba makani aakozyenye. Kumane bakapa bamanesi alimwi ababelesi bamwi baacibbadela.
Ba Bryn bakaamba kuti: “Bakandilumba kujatikizya mulimo wesu alimwi azibalo zilembedwe kabotu. Zyakabagwasya kapati.”