Kabbokesi Kamubuzyo

◼ Sena inga bazyali boonse bobile balemba ciindi ncobatola kucita ciiyo camukwasyi cicitwa lyoonse?

Nokuba kuti bamawisi mbobajisi mukuli mupati wakuyiisya bana babo “lwiiyo lwa-[Jehova] amumilazyo yakwe,” bazyali boonse bobile balatola lubazu mukuyiisya. (Ef. 6:4) Ibbaibbele likulwaizya bana kuti: “Swiilila, mwanaangu, lulayo lwauso, alimwi utataalazyi mulao wabanyoko.” (Tus. 1:8) Cibeela cimwi ciyandika kapati cakuyiisya ncobabelesya bazyali, nciiyo ca Bbaibbele camukwasyi.

Mazuba aayinda, muzyali weendelezya ciiyo camukwasyi kubana batabbapatizyidwe nguwakali kulemba ciindi alikke, nokuba kuti bazyali boonse bobile bakali kutola lubazu mumubandi. Pele lino, eeci cacincwa. Ikuti lyaciiyo camukwasyi bazyali boonse kabatola lubazu mukuyiisya bana, nkokuti boonse bobile inga balemba aumwi woola lyomwe ansondo kulipooti yamulimo wamumuunda. Masimpe, bazyali balatola ciindi cilamfwu iciinda awoola lyomwe ansondo ikuyiisya bana babo. Kuyiisya bana kuyandika kuti bazyali boonse bobile kababeleka canguzu lyoonse. (Dt. 6:6-9) Nokuba boobo, lipooti yamulimo wamumuunda yaamwezi yeelede kutondezya kapati zicitwa mumuunda. Aboobo, takweelede kulembwa mawoola aayindilila kuli lyomwe, nokuba kuti ciiyo citola maminiti aayinda kuwoola lyomwe, cilacitwa kwaziindi zinji ansondo, naa nociba ciindi mwana aumwi nayiisyigwa alikke. Muzyali omwe buyo nguuyoolemba lipooti yaciiyo ca Bbaibbele camukwasyi alimwi anyendo yakupilukila yomwe nsondo aimwi ciiyo noceendelezyegwa.