Kabbokesi Kamubuzyo

◼ Sena ciiyo ca Bbaibbele camukwasyi cileelede kulipootwa kumbungano mbuli mulimo wamumuunda?

Ikuti muzyali Munakristo kasololela ciiyo ca Bbaibbele camukwasyi alimwi ibana batanabbapatizyigwa kabaliko, ulakonzya kucita lipooti yawoola lyomwe ansondo, kupilukila komwe ansondo alimwi aciiyo ca Bbaibbele caŋanda comwe amwezi. Oobu mboceelede kuba nokuba kuti ciiyo cilaindilila kuwoola lyomwe, cilacitwa ziindi ziinda kuciindi comwe ansondo nokuba kucitwa kumwana aumwi kumugama.—Amubone ibbuku lya Mulimo Wesu, p. 104.

Ikuti boonse muŋanda kabali Bakamboni babbapatizyidwe, ciindi aciiyo tazyeelede kulembwa alipooti yamulimo wamumuunda pe, (ccita kuti mwana kaciiya bbuku lyabili kuzwa naabbapatizyigwa). Eeci cili boobo akaambo kakuti lipooti yamulimo wamumuunda yambungano itondezya cicitwa notukambauka makani mabotu akuyiisya kasimpe kamu Bbaibbele kubantu batali babelesi ba Jehova balyaabide akubbapatizyigwa. (Mt. 24:14; 28:19, 20) Nokuba boobo, eeci tacitondezyi kuti kucita ciiyo lyoonse takuyandiki kapati pe.

Mukuli wabazyali Banakristo ikwiiya abana babo. Aabo bayanda lugwasyo mukutalisya naa mukutola ambele ciiyo cabo camukwasyi, balakonzya kulomba lugwasyo kubaalu. Ikuti kakuyandika sikumwaya uumbi kuti kasololela ciiyo ca Bbaibbele kumwana musankwa naa musimbi uutana bbapatizyigwa mumukwasyi wa Banakristo bayanzana ambungano, imulangizi weendelezya naa mulangizi wamulimo weelede kubuzyigwa. Ikuti ciiyo eeco cazuminizyigwa, ooyo usololela ciiyo weelede kutola lipooti mbweena buyo mbwacita ciiyo cili coonse ca Bbaibbele.

Kuyiisya bana inzila zya Jehova kuyandika ciindi akusolekesya kutali kucitila buyo kuti mulembe alipooti yamulimo wamumuunda. (Dt. 6:6-9; Tus. 22:6) Bazyali Banakristo beelede kulumbaizyigwa akaambo kakunyamuna mukuli wabo mulemu iwakukomezya bana babo “mulwiiyo lwa –[Jehova] amumilazyo yakwe.”—Ef. 6:4.