Mulongo Wazyakucita Zyamukwasyi—Ciiyo Camukwasyi
1 Cipego cipati ncomunga mwapa bana banu mbomuli bazyali Banakristo nduyando ndomujisi kuli Jehova. Mulakonzya kucita boobu eelyo ‘nomukkala muŋanda’ kutegwa mucite ciiyo ca Bbaibbele camukwasyi cicitwa amvwiki. (Dt. 6:5-7) Kufwumbwa naa mbomukwetene limwi tabasyomi, muli mumukwasyi uunka kuzikombelo ziindene, naa muli bazyali bali balikke, mulakonzya kubagwasya bana banu kuba acilongwe andinywe alimwi a Jehova kwiinda mukuba aciiyo camukwasyi calyoonse.
2 Ikutalisya Ciiyo Camukwasyi: Ntaamu yakusaanguna nkutalisya cilengwa cakwiiya amukwasyi. Ikuti kamutazyi ciindi ncomunga mwabikka kunooiya amukwasyi, mbuti kuti mwaabandika makani aaya amukwasyi? (Tus. 15:22) Ikuti kamujisi bana baniini inga mwasala kuba aziiyo zili mbozibede zitola ciindi cisyoonto mvwiki yoonse. Amusale mulongo weendelana amukwasyi wanu. Amubikke ciindi cigaminide cakwiiya amulongo wazyakucita zyamukwasyi wanu alimwi amubone kuti mulacitobela.
3 Mmakani nzi ngomunga mwaiya? Ibamwi balalibambila ciiyo ciyoolangwa-langwa mu Ciiyo Cabbuku Cambungano naa mu Ciiyo ca Ngazi Yamulindizi. Bamwi balayiya makani abambilwa ikapati bakubusi. Usyi bana umwi wakaamba kuti: “Icintu cimwi cipa kuti ciiyo cesu kacikkomanisya kapati kubana amvwiki ncakuti tulazisobana zibeela zyamubbuku lya Ibbuku Lyangu Lyamakani Aa-Bbaibbele. Ikusindamina akuteelelwa kwamakani aayiigwa, nzezintu ziyandika kapati kwiinda mweelwe wamincali njotwiiya.”
4 Amwiiye Amvwiki: Ciiyo camukwasyi ceelede kucitwa lyoonse alimwi ceelede kuti kabacilangila boonse banamukwasyi. Cimwi ciindi inga kwayandika kucinca ciindi alimwi abuzuba bwakwiiya kutegwa mulanganye zintu zimwi zitalangilwi. Alimwi ziindi zimwi inga kwayandika kucinca makani ayeelede kulangwa-langwa. Pele kucinca kuli koonse kuyandika takweelede kupa kuti bubambe bubikkidwe bwakwiiya butacitwi kwaciindi cilamfwu. Usyi bana umwi ucita kuti ikuti ciindi cakwiiya cacincwa, ulalemba ciindi cipya akapepa akukasiya abusena mpobakonzya kukabona boonse banamukwasyi. Ikusoleka kuli boobu kwakuba aciiyo camukwasyi lyoonse kulalumbwa. Eelyo nomuzumanana kukomezya bana banu “mulwiiyo lwa-[Jehova] amumilazyo yakwe,” mulatondezya luyando ndomujisi kuli mbabo alimwi akuli Taata wesu wakujulu.—Ef. 6:4.