Amubayiisye Bantu Kuti Bamuyande Jehova
1. Ino ncinzi cipa bantu bamwi kuswenenena kuli Jehova?
1 Sena mulayeeya lweendo lwakusaanguna nomwakamvwa zijatikizya Jehova? Ino ncinzi cakamupa kuswenenena kulinguwe? Bantu banji babombe myoyo bayoomwaambila kuti bakaswenenena ku Mulengi wesu ciindi nobakaiya kujatikizya bube bwakwe butakonzyi kweezyanisyigwa, ikwaambisya luzyalo alimwi aluyando ndwajisi.—1 Joh. 4:8.
2, 3. Ino mbuti mbotukonzya kulibelesya bbuku lya Bbaibbele Ncoliyiisya kugwasya basikwiiya Bbaibbele kutegwa bamuyandisye Jehova?
2 “Ngooyu Leza Wesu”: Bbuku lya Bbaibbele Ncoliyiisya likankaizya luyando ndwajisi Jehova alimwi ambociyandika kumuntu aumwi kuba acilongwe anguwe. Ino mbuti mbotukonzya kulibelesya bbuku eeli kuyiisya bantu kutegwa bamuyandisye Leza? Ciindi notubandika kaambo nkatazyi kabotu muntu, tulakonzya kubuzya mibuzyo iipa kuyeeya, mbuli wakuti: “Ino kasimpe aaka kayubununa nzi kujatikizya Jehova?” naa kuti “Muunzila nzi kaambo aaka mbokapa bumboni bwakuti Jehova ngu Taata siluzyalo, muntu uuli woonse ngwakonzya kuyanda?” Kuyiisya munzila eeyi kulakonzya kumugwasya sikwiiya kutalika kuba acilongwe citamani a Jehova.
3 Ikuti twabagwasya basikwiiya Bbaibbele kuzyiba mbociyandika kapati kuba aluzyibo kujatikizya Leza wakasimpe alikke alimwi uupona, bayoozuminizya kweelana amajwi aa Isaya aakuti, “ngooyu Leza wesu.” (Is. 25:9) Notupandulula Jwi lya Leza, tweelede kukankaizya mbobayoolongezyegwa bantu aakuzuzikizyigwa makanze aa Jehova kwiinda mukubelesya mfwulumende yakwe iiluleme yeendelezyegwa a Kristo Jesu.—Is. 9:6, 7.
4, 5. Ino kuyanda Jehova cipandulula nzi?
4 Bumboni Butondezya Luyando Ndwajisi Jehova: Tulizyi kuti kuyanda Jehova amoyo woonse, muuya woonse, alimwi amizeezo yoonse takubikkilizyi buyo mbotulimvwa kujatikizya Leza. Tweelede kuyeeya mbwayeeya. (Int. 97:10) Luyando ndotujisi kuli Leza lulabonwa kwiinda mukutobela malailile aakwe oonse alimwi akuzumanana “kweenda munzila iisalala amukulemeka Leza,” nociba ciindi notusukusyigwa alimwi akukazyigwa.—2 Pet. 3:11; 2 Joh. 6.
5 Kucita kuyanda kwa Leza akaambo kakuti tulamuyanda kulakkomanisya kapati. (Int. 40:8) Sikwiiya Bbaibbele weelede kuzyiba kuti malailile aa Leza oonse abambilidwe kugwasya babelesi bakwe kukabe kutamani. (Dt. 10:12, 13) Muntu ulatondezya kulumba kupati kumilimo mibotu yoonse ya Leza kwiinda mukupona kweelana amalailile aa Jehova. Amumugwasye sikwiiya kumvwisya kuti kweenda munzila zya Jehova ziluleme kuyoomupa kuti atanjili mumapenzi naa kuusa kuboola akaambo kakutatobela nzila zya Jehova.
6. Ino nzilongezyo nzi muntu nzyakonzya kulongezyegwa akaambo kakumuyanda Jehova?
6 Zilongezyo Kuli Baabo Bamuyanda Leza: Jehova ulabalanganya kapati bantu balibombya ibamuyanda, alimwi ulabayubunwida “makani malamfu aabulondo bwa-Leza.” (1 Kor. 2:9, 10) Akaambo kaluzyibo oolu ndobajisi lwamakanze aa Jehova, balamvwisya mazuba aakumbele mbwaabede alimwi akuba abulangizi bwini-bwini. (Jer. 29:11) Aabo bamuyanda Jehova ulabafwida luzyalo lulibedelede. (Kul. 20:6) Balabuyeeya lyoonse bulangizi bwakuyooba abuumi butamani nkaambo kakuti Leza ulabayandisya kapati.—Joh. 3:16.
7. Ino mulimvwa buti kujatikizya mulimo wakuyiisya bantu kuti bamuyande Jehova?
7 Ikuti twamuzyiba kapati Taateesu uuli kujulu, ciyootupa kwaambila bamwi kujatikizya nguwe. (Mt. 13:52) Elo ncoolwe cipati kaka kuyiisya bantu, ikwaambisya bana besu kuti bamuyande Jehova! (Dt. 6:5-7) Twalombwa kuti swebo antoomwe ambotwiiya limwi Bbaibbele tuzumanane kutembaula cakukankaizya notubona ‘impuwo yabubotu bwa Jehova.’—Int. 145:7.