Kabbokesi Kamubuzyo
◼ Ikuti bantu ibayanda kukwatana bayanda kubelesya Ŋanda ya Bwami kucitila bwiinga, ino ntwaambo nzi ntobayandika kubandika abaalu?
Bwiinga bubambwa kweelana anjiisyo zyamu Bbaibbele, buletela bulemu kuli Jehova. Eeci ncamasimpe ikwaambisya bwiinga bucitilwa ku Ŋanda ya Bwami, mbokunga bantu bamucilawo babona mapulogilamu aacitilwa abusena oobu kuti atondezya mboibede mbunga yesu. Kutegwa “zintu zyoonse buyo zicitwe kabotu akucililana,” cilayandika kuti baalu bambungano babandike abaabo ibayanda kukwatana kujatikizya twaambo tumwi tujatikizya bwiinga bwabo iciindi nobalomba kubelesya Ŋanda ya Bwami.—1 Kor. 14:40.
Bantu ibayanda kukwatana eelyo balombozya kubelesya Ŋanda ya Bwami kucitila bwiinga bwabo beelede kulemba lugwalo kukkomiti yamulimo yambungano iibelesya Ŋanda ya Bwami eeyo. Lugwalo lwabo lweelede kupegwa kakucili ciindi alimwi lweelede kutondezya buzuba alimwi aciindi nobayanda kuyooibelesya Ŋanda ya Bwami. Beelede kuzyiba kuti baalu tabakooyoocinca ciindi camiswaangano akaambo kabwiinga. Kuyungizya waawo, basikukwatana beelede kuba bantu balilemeka, ibapona kweelana anjiisyo zyamu Bbaibbele alimwi azyeelelo zya Jehova ziluleme.
Kutegwa babe masimpe kuti bwiinga bupa bulemu kuli Leza wesu uulemekwa, aabo ibayanda kukwatana beelede kubandika abamukkomiti yamulimo kujatikizya bubambe bwabwiinga kabatanamanizya kububamba. Nokuba kuti baalu tabakabasalili zyakucita kweelana anzyobayanda balo, basikukwatana aaba beelede kutobela caamba baalu kuti naa ncobalibambila kucita ciboneka kuti taciluzi. Zilikke nyimbo zijanika mubbuku lyesu lyanyiimbo nzyezyeelede kulizyigwa naa kubelesyegwa. Kubikka maluba-luba naa madeeko kuti mubotesye mu Ŋanda ya Bwami naa kubambulula mbozikkala zyuuno akwalo inga kwacitwa buyo ikuti naa kwazumizyigwa. Ikuti naa kuli kufwotolwa naa kulekkooda vidiyo, eeci taceelede kunyonganya bubambe oobu bwabulemu. Baalu inga bazumizya kuti zyakulibambila kujatikizya ziyakucitika lyabwiinga zicitilwe ku Ŋanda ya Bwami kufwumbwa kuti eeci kacitanyonganyi bubambe bwamiswaangano yambungano. Tupepa twakutamba bantu kubwiinga tatweelede kubikkwa abboodi lyamakani. Nokuba boobo, baalu inga bapa cakwaambilizya cifwaafwi lya Muswaangano wa Mulimo kuzyibya mbungano kujatikizya bwiinga buyoobeda a Ŋanda ya Bwami.
Nokuba kuti tacili cintu ciyandika buya kuti basimbi abasankwa basindikila basikukwatana kababbapatizyidwe, inga tiiceelela kubikkilizya bantu bapona buumi buteendelani anjiisyo zyamu Bbaibbele naa aabo bapona buumi bunga bwapa kuti bantu ibajanika batalike kubuzya mibuzyo. Ikuti kabaliko baalu, bwiinga bweelede kweendelezyegwa amwaalu uusalidwe. Baalu mbaamayi ba Jwi lya Leza, aboobo mbobeelela kapati kukankaizya njiisyo zyamu Magwalo zyeelela lyaciindi eeci cibotu kapati.—1 Tim. 3:2.
Alimwi mbokunga bwiinga bulamujatikizya mwaalu uubweendelezya, awalo weelede kuzyibisyigwa kujatikizya zyintu nzyobalibambila kwaakucita. Uyooswaangana abasikukwatana kuti azyibe mbuli mbobakali kulilemeka ciindi nobakali kweebana; aabo ibayanda kukwatana beelede kwaamba cakutasisa alimwi cakusyomeka. Ikuti naa nabwiinga wakalikwetwe naanka sibwiinga kuti wakalikwete, weelede kutondezya ncobeni kuti ulaangulukide kukwatwa naa kukwata kweelana amulawo alimwi a Magwalo. (Mt. 19:9) Eeci caamba kutondezya mwaalu ipepa litondezya kuti bakalekana ncobeni.
Ikuti bantu aaba ibayanda kukwatana baambila baalu zyintu nzyobakanza kucita alimwi akubelekela caantoomwe ambabo, bwiinga buyoopa kuti bantu boonse bakkomane.—Tus. 15:22; Heb. 13:17.