Kabbokesi Kamubuzyo

◼ Sena bantu naa mbungano zileelede kubelesya zitondezyo naa mazyina aambunga zizumizyidwe amulawo izibelesyegwa a Bakamboni ba Jehova?

Mbunga aimwi ilijisi citondezyo naa zyina lizumizyidwe amulawo. Aboobo citondezyo ca Ngazi Yamulindizi ciiminina mbunga ya Watch Tower Bible and Tract Society of Pennsylvania ambunga zimwi zibelesyegwa ambunga ya Bakamboni ba Jehova. Imbunga ya Christian Congregation of Jehovah’s Witnesses ibelesya citondezyo ca Bbaibbele lijalwidwe mumagwalo ngoilemba. Mbunga zimbi zibelesyegwa a Bakamboni ba Jehova zijisi zitondezyo zimbi.

Mazyina naa zitondezyo zyambunga zizumizyidwe amulawo izibelesyegwa ambunga ya Bakamboni ba Jehova tazyeelede kubelesyegwa amuntu naa mbungano ili yoonse nokuba kulembwa a Maanda aa Bwami, azikwankwani, mumagwalo naa azyintu zilizyoonse. Takweelede nokuba kubelesya mazyina naa zitondezyo zikozyanya azyambunga eezyi. Ikucita boobo kulakonzya kunyonganya baiminizi bamfwulumende, basikumwaya alimwi abantu bambi ikuzyiba lwiindano luliko akati kambungano ambunga zizumizyidwe amulawo. Alimwi magwalo aalembwa abantu naa mbungano zibelesya zitondezyo eezyi inga abonwa mbuli kuti azumizyigwa naa azwa kuofesi ya mutabi naa kumaofesi mapati aa Bakamboni ba Jehova.

Citondezyo ca Ngazi Yamulindizi, naa cimbi cikozyanya aceeci, taceelede kubelesyegwa a Maanda aa Bwami aayakwa niiba Ŋanda ya Bwami iili mumaanza aambunga eeyi. Imbungano zijisi Maanda aa Bwami aalembedwe citondezyo eeci tazyeelede kucinca mpoonya-mpyoonya ikuti naa kucita boobo inga kwapa kuti mayake abambululwe mumbazu zimwi, naa inga kwayandika mali manji aciindi cinji cakucita mulimo ooyu. Nokuba boobo, ikuti kucinca ooku kakutakatazyi alimwi kakutaduli, imbungano eezyi zilakonzya kucita boobo ndilyonya lino. Pele ikuti kakuyandika kucinca kupati, kulakonzya kucitwa aciindi cibikkidwe cakubambulula cikwankwani naa Ŋanda ya Bwami.