Ino Mbunga ya Watch Tower Bible and Tract Society Ninzi?
Mbunga ya Watch Tower Bible and Tract Society of Pennsylvania nimbunga iitapangi mpindu iyakatalisyigwa mu 1884 kwiinda mukutobela milawo ya Commonwealth of Pennsylvania, U.S.A. Ilabelesyegwa a Bakamboni ba Jehova kusumpula mulimo wabo wanyika yoonse, walo uubikkilizya akumwaya ma Bbaibbele alimwi amabbuku aamba zyamu Bbaibbele.
Kweelana abbuku ilyaamba makanze aambunga eeyi, makanze aanjiyo ajatikizya “bukombi, kuyiisya alimwi amilimo yakugwasya bantu,” ikapati “kukambauka alimwi akuyiisya mulumbe wa Bwami bwa Leza mubusolozi bwa Kristo Jesu.” Kutegwa muntu abe mumbunga eeyi, ccita buyo kuti watambwa alimwi kutambwa ooko takuyeeme akuvwula kwamali ngaasanga muntu. Bantu ibali mumbunga eeyi alimwi abeendelezi, bagwasyilizya bamu Kabunga Keendelezya ka Bakamboni ba Jehova.
Mbunga Zizumizyidwe Amulawo Izigwasyilizya
Kunze aambunga ya Watch Tower Bible and Tract Society of Pennsylvania, Bakamboni ba Jehova balabelesya mbunga zinji izizumizyidwe amulawo muzisi ziindene-indene. Akati kambunga eezyi, mumazina aanzizyo kulabikkilizyigwa amabala mbuli aakuti “Watch Tower,” “Watchtower,” naa kwaasandulula.
Kuzwa nozyakatalisyigwa, mbunga eezyi zyatugwasya kucita mulimo mupati mbuli:
Kulemba alimwi akumwaya. Twamwaya ma Bbaibbele aabalilwa ku 220 miliyoni alimwi amabbuku aamba zyamu Bbaibbele aabalilwa ku 40 bbiliyoni mumyaambo iinda ku 700. Webbusaiti ya jw.org yagwasya bantu kubala Bbaibbele a Intaneti kakunyina kubbadela mumyaambo iinda ku 120 alimwi akujana bwiinguzi kumibuzyo mbuli wakuti, “Ino Bwami bwa Leza Ninzi?”
Zikolo. Tuleendelezya zikolo ziindene-indene kuyiisya Bbaibbele. Mucikozyanyo, kuzwa mu 1943 Bakamboni ba Jehova ibainda ku 8,000 bagwasyigwa alwiiyo lupegwa mucikolo citegwa Watchtower Bible School of Gilead, kubapa kuti babeleke kabali bamisyinali naa kuyumya mulimo wesu wanyika yoonse. Alimwi nsondo ansondo mamiliyoni aabantu kubikkilizya abaabo ibatali Bakamboni, balatambula malailile kumiswaangano iicitwa mumbungano zyesu. Kuyungizya waawo tuleendelezya zikolo zyakwiiya kubala akulemba alimwi tulijisi abbuku lijanika mumyaambo iili 110 iliyiisya bantu kubala akulemba.
Milimo yakugwasya bantu. Twagwasya bantu ibali mumapenzi akaambo kantenda kwiinda mukubapa zintu zyakuligwasya—taciko makani naa ntenda eezyo zyapangwa abantu, mbuli yeeyo yakujayana yakacitika mu 1994 ku Rwanda naa ntenda zilicitikila mbuli yamuzuzumo yakacitika mu 2010 ku Haiti.
Nokuba kuti kwacitwa zintu zinji kwiinda mumbunga eezyi nzyotubelesya, mulimo wesu tauyeeme ambunga eezyi. Munakristo umwi aumwi ulijisi mukuli uumugeme wakuzuzikizya mulawo uuzwa kuli Leza wakukambauka alimwi akuyiisya makani mabotu. (Matayo 24:14; 28:19, 20) Tusyoma kuti Leza ulatugwasyilizya mumulimo wesu alimwi akuti ulazumanana kupa kuti mulimo ooyu ‘ukomene.’—1 Bakorinto 3:6, 7.