Mbotukonzya Kukambaukila Bamaalumi
1. Ino ncinzi ciyandika cakufwambaana mumulimo wakulanganya zyintu zya Bwami?
1 Imulimo wakukambauka makani mabotu aa Bwami mbouzumanana kuya ambele mumazuba aano aakumamanino, bamaalumi bajisi zyeelelo zyakumuuuya balayandika cakufwambaana kutegwa basololele mumulimo ooyu. (Mk. 4:30-32; Inc. 20:28; 1 Tim. 3:1-13) Nokuba boobo, mumasena amwi bamakaintu ibautambula mulumbe wa Bwami mbanji kwiinda bamaalumi. Muzilengwa zimwi, bamaalumi bapa bamakaintu babo mukuli wakuyiisya bana makani aabukombi. Ino mbuti mbotukonzya kukulwaizya bamaalumi banji kuti batalike kubikkila maano kuzyintu zyakumuuya alimwi akuti batusangane mubukombi bwamasimpe?
2. Ino ncinzi cakacitika ciindi Paulo a Petro nobakakambaukila bamaalumi?
2 Amubikkile Maano Kukukambaukila Bamaalumi: Ikuti mutwe wamukwasyi wakazumina kasimpe, ulakonzya kupa kuti banamukwasyi bamusangane mubukombi bwamasimpe. Mucikozyanyo, Paulo a Sila nobakali muntolongo akaambo kakukambauka, bakakambaukila ulindilila ntolongo. Sikulindilila ntolongo amukwasyi wakwe woonse bakabbapatizigwa. (Inc 16:25-34). Akaambo kakukambauka kwa Paulo mu Korinto, “Krispo, mupati wacikombelo, wakasyoma mu Mwami alimwi abeŋanda yakwe boonse.” (Inc. 18:8) Petro wakabelesyegwa a Jehova kukambaukila Korneliyo, mupati wankamu yabasilumamba oyo walo “wakali muntu uukomba, uuyoowa Leza.” Korneliyo, antoomwe abasazinyina abeenzinyina bakabbapatizigwa.—Inc. 10:1-48.
3. Mukwiiya Filipo, ino mbaani bali “mubwami” mbotukonzya kukambaukila?
3 Kukambaukila bantu bali “mubwami” naa beendelezi kulakonzya kupa kuti mulumbe usakane. (1 Tim. 2:1, 2) Mucikozyanyo, angelo wa Jehova wakaambila Filipo kuti akakanane amwaalumi “wabwami” iwakali kulanganya lubono loonse lwa mwami mukaintu waku Etiopiya. Filipo wakamumvwa mwaalumi ooyu “ulabala kuli-Isaya musinsimi,” mpoonya wakamukambaukila mulumbe mubotu wa Jesu. Ooyu mwaalumi muna Etiopiya wakaba sikwiiya alimwi kweelede kuti wakali kuya bukambauka makani mabotu naakali kujokela kumunzi wakwe. Alimwi ndiza wakamukambaukila mwami mukaintu abaabo mbaakali kukkala limwi, ibantu batakali kulangilwa kuti inga bakambaukilwa mulumbe mubotu.—Inc. 8:26-39.
4. Ino mbuti mbotukonzya kukambaukila bamaalumi banji?
4 Mbomukonzya Kukambaukila Bamaalumi Banji: Mbokunga bunji bwaziindi bamaalumi inga bali kumilimo buzuba boonse, sena inga mwalibambila kukambauka kumazuba, kumamanino aansondo naa mumazuba aakulyookezya? Kukambaukila kumasena aamakwebo kulakonzya kupa kuti tube acoolwe cakukambaukila bamaalumi batajaniki-janiki aŋanda. Bakwesu balakonzya kupa bumboni bwamukwiizya kuli bamaalumi mbobabeleka limwi. Nobali mubukambausi bwakuŋanda aŋanda, ikapati mucilawo cikambaukilwa bunji bwaziindi, ibakwesu balakonzya kulomba kuti babandike asilutwe wamukwasyi.
5. Ino mucizyi inga wacita buti ikuti wajana mwaalumi uujisi luyandisisyo lwakwiiya Bbaibbele?
5 Mucizyi wajana mwaalumi uujisi luyandisisyo lwakwiiya kasimpe tayelede kujokelela kali alikke kumwaalumi ooyo. Ulakonzya kuunka amulumi wakwe naa asikumwaya uumbi. Ikuti muntu ooyo wazumanana kuba aluyandisisyo, inga cagwasya ikupa mukwesu uusimide kutegwa azumanane kumuyiisya.
6. Ino mbuti mbotukonzya kwiiya mwaapostolo Paulo kutegwa ‘tuvube bantu banji’?
6 Amusale Makani Aakonzya Kukkomanisya Bamaalumi: Imwaapostolo Paulo wakali kubabikkila maano bantu amane wakali kubakambaukila makani aakonzya kubakkomanisya kutegwa ‘avube banji mbuli mbwaakali kukonzya.’ (1 Kor. 9:19-23) Mbubonya mbuli Paulo, andiswe tweelede kusala makani aakonzya kubakkomanisya bamaalumi alimwi akulibambila bweelede. Mucikozyanyo, bunji bwaziindi bamaalumi balaabikkila maano makani aajatikizya buyumu-yumu bwakujana mali, mfwulumende mbotu ambobakonzya kukwabilila mikwasyi yabo. Alimwi balakonzya kuyanda kuzyiba ncotuponena, iciya kucitika kunyika eeyi alimwi akaambo Leza ncalekelede kupenga. Bantu balakonzya kuutambula mulumbe wa Bwami ikuti katubelesya bupampu munzila eeyi notubakambaukila.—Tus. 16:23.
7. Ino mbuti bantu boonse bamumbungano mbobakonzya kugwasya bamalumi batasyomi ibajanika kumiswaangano yambungano?
7 Amubagwasye Bamalumi Batasyomi: Nokuba kuti kulilemeka kwabacizyi besu Banakristo kulakonzya kupa kuti bamalumi batasyomi bacince, basimbungano abalo balakonzya kugwasyilizya. (1 Pet. 3:1-4) Ikuti mulumi uutasyomi watambulwa amaanza obilo ciindi naboola kumuswaangano wambungano amukaintu wakwe, ulakonzya kukulwaizyigwa kapati. Ikujanika kwakwe kumuswaangano wambungano ncitondezyo cakuti ulakayanda kasimpe, akuti ulakonzya kuzumina kuba aciiyo ca Bbaibbele.
8. Ino mbuti bakwesu mbobakonzya kugwasya bamalumi batasyomi ibatalika kutondezya kuti balakayanda kasimpe?
8 Zimwi ziindi, bamalumi bamwi tabayandi zyintu zyakumuuya pele mukuya kwaciindi balakonzya kuba aaluyandisisyo lwakubandika makani aamu Bbaibbele amukwesu ngobazyibide. Ibakwesu bamumbungano imwi bakajisi bubambe bwakuswaya mwaalumi uutasyomi uukwete mucizyi. Bakali kubandika amwaalumi ooyu kujatikizya makani ngobakazyi kuti alakonzya kumukkomanisya. Mukuya kwaciindi, ikucita boobo kwakapa kuti batalike kubandika makani aamu Bbaibbele, ecino ciindi ulibbapatizidwe. Kubusena bumwi, imukwesu wakagwasya mulumi uutasyomi ikuyaka lubaya. Kwiinda mukutondezya kuti mukwesu ulamubikkila maano, ciiyo ca Bbaibbele cakatalisigwa. (Gal. 6:10; Flp. 2:4) Ikuti kamuli bakwesu Banakristo, sena inga tiimwaba abubambe bwakutalika kuswaya bamalumi batasyomi?
9. Ino ncinzi cikonzya kucitika ikuti naa bamaalumi Banakristo bagwasyigwa?
9 Ikugwasya Bamaalumi Banakristo Kuti Bakacikonzye Kuba Amikuli Kumbele: Bamaalumi ibatambula kasimpe ka Bwami akutondezya kuti balijisi luyandisisyo lwakuti beelele kupegwa mikuli mumulimo wa Jehova balakonzya kuba “zipego muciimo cabantu,” nkokuti kuba baalu Banakristo ibagwasya bantu bali mumbungano zya Jehova. (Ef. 4:8; Int. 68:18, NW) Bamaalumi bali boobo beembela mbungano camoyo omwe. (1 Pet. 5:2, 3) Elo kaka ibabunyina boonse balagwasyigwa kapati abakwesu bali boobo!
10. Ino mbuti bantu banji mbobagwasyigwa akaambo kakuti Ananiya wakagwasya Paulo?
10 Mucikozyanyo, nokuba kuti kaindi wakali kupenzya Banakristo, Saulo wakaba “apostolo wabamasi.” (Rom. 11:13) Sikwiiya wiitwa kuti Ananiya wakalengaana kukambaukila Saulo kumatalikilo. Nokuba boobo, Ananiya wakatobela malailile aa Mwami, aboobo wakakambaukila mwaalumi ooyu iwakaba mwaapostolo Paulo. Mukuya kwamyaka, mulimo wa Paulo wakagwasya bantu banji ibakali kumuswiilila alimwi kuli tuulunzuma twabantu ibazumanana kugwasyigwa amagwalo aakasololelwa amuuya aalembedwe mu Jwi lya Leza.—Inc. 9:3-19; 2 Tim. 3:16, 17.
11. Ino nkaambo nzi ncotweelede kusoleka canguzu kutegwa tukambaukile bamaalumi?
11 Aboobo atuzumanane kusoleka canguzu kukambaukila bamaalumi. Ikucita boobo kulakonzya kupa kuti Jehova aleleke mulimo ngotucita wakutola ambele zyintu zya Bwami.