Sena Mulakonzya Kubagwasya Bantu Bakwetene a Bakamboni?
1. Ino nkaambo nzi Banakristo bakwetene abantu batali Bakamboni ncobatali balikke ibayanda kuti bantu mbobakwetene limwi baiye kasimpe?
1 Sena mumbungano yanu kuli basikumwaya bakwetene abantu batali Bakamboni? Ikuti kabaliko, cakutadooneka basikumwaya aaba inga bayanda kuti mbobakwetene limwi baiye kasimpe. Pele tabali balikke ibalimvwa boobo. Mbubwenya mbuli mbwalimvwa Leza, boonse bamumbungano bayanda kuti “bantu boonse bafwutulwe akuba aluzyibo lwini-lwini lwakasimpe.” (1 Ti. 2:4) Mbuti mbotukonzya kubagwasya bantu batali Bakamboni pele bakwetene a Bakamboni?
2. Mbuti ikuba abupampu mbokunga kwatugwasya kutegwa tucikonzye kubagwasya bantu bakwetene a Bakamboni?
2 Cakusaanguna, tweelede kutubona twaambo mbobatubona aaba bantu batali Bakamboni. Ibantu banji batali Bakamboni pele bakwetene a Bakamboni balakonzya kuti balauyanda mukwasyi wabo alimwi balasoleka canguzu kuba balumi bali kabotu, bakaintu naa bazyali bali kabotu. Ambweni basyoma njiisyo zyabukombi ziindene anzyotusyoma. Ndiza kunyina ncobazyi kujatikizya Bakamboni ba Jehova kunze buyo kwatwaambo tumwi tutaluzi ntobakaambilwa abeenzinyina. Bamwi balanyema akaambo kakuti bakaintu naa balumi babo baunka kumiswaangano muciindi cakukkala ambabo aŋanda mbuli mbobakali kucita kaindi. Kuba abupampu cilakonzya kutugwasya kubeendelezya kabotu, kubalemeka alimwi akutabayoowa ciindi notuli antoomwe ambabo.—Tus. 16:20-23.
3. Ninzila nzi iinda kubota yakugwasya bantu bakwetene a Bakamboni kutegwa batambule kasimpe?
3 Kubabikkila Maano: Nzila iinda kubota yakugwasya bantu bakwetene a Bakamboni kuti batambule kasimpe, nzyintu nzyotucita ikutali buyo kubandika ambabo makani aamu Bbaibbele. (1 Pe. 3:1, 2) Cintu cipati ncotweelede kucita, nkubabikkila maano. Bacizyi mumbungano balakonzya kumubikkila maano mukaintu uukwetwe kuli Kamboni, abalo bakwesu balakonzya kucita mbubwenya kumulumi uukwete Kamboni. Mbuti mbobakonzya kucita oobo?
4. Mbuti mbotukonzya kutondezya kuti tulababikkila maano bantu bakwetene a Bakamboni?
4 Kuti kamutana bwenene amuntu ukwetene a Kamboni, ambweni inga mwasaanguna kubandika a Kamboni ngobakwetene limwi. Mutatyompwi kuti tanaamutambula kabotu mulweendo lwakusaanguna. Kumusangaalizya akumubikkila maano kulakonzya kumugwasya kubalanga munzila yeelede Bakamboni ba Jehova. (Lom. 12:20) Banakristo bamwi basimide balakonzya kumutamba muntu uukwetene a Kamboni antoomwe amukwasyi wakwe kucakulya, kutegwa bazyibane kabotu akumugwasya kuzyiba makani aamasimpe kujatikizya Bakamboni ba Jehova. Balabandika makani aamukkomanisya muntu uutasyomi muciindi cakulemenezya mubandi kuzyintu zyakumuuya mpoona-mpoona. Mukuya kwaciindi, muntu uutasyomi alimvwa kwaanguluka mulakonzya kuba amubandi wamu Magwalo. Ambweni ulakonzya kuzumina kutambwa kumuswaangano kutegwa abone ncaiya mukaintu wakwe mbwaanga ulibazyi kale bamwi mumbungano. Nokuba kuti tanalibambila kwiiya kasimpe, tulakonzya kumulumba akaambo kakuti ulamuzumizya mukaintu wakwe kucita zyintu zyakumuuya.
5. Mbuti baalu mbobakonzya kumugwasya muntu uukwetene a Kamboni?
5 Baalu beelede kuba kumbele kuswaya bantu bakwetene a Bakamboni akujana nzila zyakupa bumboni. Muntu uutasyomi iwatakali kuyanda kwiiya Bbaibbele ulakonzya kuswiilila ciindi naaciswa. Kuti mukwasyi uutakamantene mubukombi wasikilwa penzi limwi mbuli kufwidwa, baalu balakonzya kumuumbulizya ooyo uutasyomi antoomwe amukwasyi.
6. Ino nkaambo nzi ncotweelede kubaswaya bantu bakwetene a Bakamboni?
6 Amuyeeye buyo mbwakonzya kulimvwa mukwesu naa mucizyi uukwetene amuntu uutali Kamboni kuti muntu ooyo ngobakwetene limwi wakatambula kasimpe! Eeci cilakonzya kumukkomanisya Jehova, bangelo, abantu boonse bali mumbungano. (Lk. 15:7, 10) Ikuti muntu ooyo uutali Kamboni tautambuli mulumbe, tulakonzya kubotelwa kuzyiba kuti ikusoleka kwesu kulamukkomanisya Jehova “[uu]tayandi kuti muntu uuli woonse anyonyoonwe, pele uyanda kuti boonse bakonzye kweempwa.”—2 Pe. 3:9.
[Majwi aakwelelezya sikubala aali apeeji 6]
Nzila iinda kubota yakugwasya bantu bakwetene a Bakamboni kuti batambule kasimpe, nzyintu nzyotucita ikutali buyo kubandika ambabo makani aamu Bbaibbele