Sena Mulilibambilide Kwiimbila Jehova Lyamiswaangano Yesu?
1 Ikulibambila kutola lubazu mumiswaangano yesu kulabikkilizya akulibambila kwiimba nyimbo zyakutembaula. Atulange-lange twaambo tutobela.
2 Amwaamvwisye Majwi Aali Munyimbo: Ilugwalo lweendelana amutwe wanyimbo alimwi amagwalo aamwi aali kumamanino aanyimbo atondezya kuti majwi aali munyimbo azwa mu Bbaibbele.
3 Amulibambile: Mulakonzya kubelesya ciindi cimwi nomucita bubambe bwa Kukomba Mumukwasyi mvwiki amvwiki ikwiiya nyimbo zipya. Nomulibambila nyimbo izitikabelesyegwe amuswaangano aumwi, amutobelezye nyimbo zyakalekkoodwa. Mulakonzya kwiiya mbozyeelede kwiimbwa alimwi amajwi aanyimbo zimwi zipya kwiinda mukuswiilila ku CD ya Amwiimbile Jehova—Nyimbo Zyamajwi, Disk 1.
4 Sena munoolibambilide kwiimba twaakutalika kubelesya bbuku lyanyimbo lyakuti Amumwiimbile Jehova? Munoolibambilide ikuti naa mwajana ciindi cakuzyiba ncozyaamba nyimbo alimwi akwiiya mboziimbwa.