Nyimbo Zipya Zyabukombi!
1 Kumuswaangano wamwaka wakacitwa caino-ino wa Watch Tower Bible and Tract Society of Pennsylvania, iwakacitwa mu October 4, 2014, kwakaambilizyigwa kuti bbuku lyanyimbo ndyotubelesya lino liyanda kulembululwa. Eelo kaka aaya akali makani aakkomanisya ncobeni! Boonse ibakajanika kumuswaangano ooyu bakayeezyegwa mboziyandika kapati nyimbo zya Bwami mubukombi bwesu.—Int. 96:2.
2 Mulakonzya kulibuzya kuti, ‘Nkaambo nzi bbuku lyanyimbo ncolyeelede kulembululwa?’ Kuli twaambo tunji. Kakusaanguna nkakuti, kumvwisya kwesu kwa Magwalo kwazumanana kucinca aboobo eeci cilaajatikizya majwi aali munyimbo zyesu. (Tus. 4:18) Kaambo kambi nkakuti: Mumyaambo minji, majwi manji aabelesyedwe mubbuku lyanyimbo ndyotubelesya akazwa mu Bbaibbele lyakaindi lya Busanduluzi Bwanyika Mpya. Lino majwi aayo aali munyimbo eezyo ayelede kucinca kutegwa ayendelane ambwaalembedwe mu Bbaibbele lyakalembululwa. Mbwaanga kunooli mulimo mupati uuyandika kucitwa kutegwa majwi aali munyimbo ayendelane akumvwisya kwalino, kwakasalwa kuti kuyungizyigwe nyimbo zisyoonto zipya mubbuku lyanyimbo.
3 Sena tweelede kulindila kusikila bbuku lyanyimbo lipya likasimbwe nceciindi notuyakutalika kubelesya nyimbo zipya? Peepe. Tulikkomene kumuzyibya kuti myezi iili mbwiibede iiboola, nyimbo zipya izili mbozibede zinoobikkwa a Webbusaiti yesu ya jw.org. Ciindi nolwamwaigwa lwiimbo lupya, lunoobikkwa amulongo kuti lukabelesyegwe kumamanino aa Muswaangano Wamulimo kalujisi majwi aakuti “lwiimbo lupya.”
4 Mbomukonzya Kwiiya Nyimbo Zipya: Cilakonzya kukatazya kwiiya lwiimbo lupya. Nokuba boobo, mbubwenya mbuli sintembauzyo, tuyanda kunakwiimba kumiswaangano yambungano kutali ‘kuumuna buyo pe.’ (Int. 30:12) Kutegwa mwiiye lwiimbo lupya, amutobele ntaamu eezyi:
Amuluswiilile cakwiinduluka-induluka lwiimbo lwakalekkoodwa lwalo iluyoobikkwa a Webbusaiti yesu. Ikuti mwaluswiilila ziindi zili mbozibede, tacikamukatazyi kuyeeya mbolwiimbwa.
Amwaayiye majwi aali munyimbo, akusola kwaapeta.
Amwiimbe majwi aali mulwiimbo kutobelezya lwiimbo lwakalekkoodwa lunyina majwi. Amucite oobo kusikila mwaluzyiba lwiimbo.
Amuziinduluke nyimbo zipya ciindi nomucita Kukomba Kwamukwasyi kusikila mane mukwasyi wanu wazizyiba.
5 Kumyezi yakumbele ciindi lwiimbo lupya noluyoobikkwa amulongo kuti lubelesyegwe kumamanino aa Muswaangano Wamulimo, basimbungano bayoosaanguna kuswiilila lwiimbo lwakalekkoodwa ciindi comwe. Mpoonya bayakwiimba antoomwe kutobelezya lwiimbo lwakalekkoodwa mbubwenya mbuli mbotucita kunyimbo zimbi.
6 Mwaciyeeya buyo, kwiimba kumiswaangano yesu citupa coolwe cakwiimbila antoomwe kutembaula Jehova. Aboobo, tatweelede kuba aciyanza cakuzwa anze casika ciindi cakwiimba lwiimbo kumiswaangano yesu ya Bunakristo.
7 Kuli nzila aimwi mbotukonzya kutondezya kulumba akaambo kanyimbo zyesu zisetekene. Kumiswaangano mipati, kulalizyigwa nyimbo zyamalimba kacitanatalika cibeela cimwi acimwi. Ziindi zyobilo amwaka, bakwesu abacizyi balyaabide ibazwa munyika yoonse mboizulwa balaunka ku Patterson, New York, kwiinda mukubelesya mali aabo kutegwa bakaimbe nyimbo zyakubelesya mubukombi bwesu. Aboobo, ciindi sicuuno naatutamba kuti tukkale akuswiilila nyimbo, tweelede kucita oobo. Kucita boobu ciyootugwasya kulibambila kabotu mumyoyo yesu kutegwa tuswiilile makani aatobela.—Ezr. 7:10.
8 Tulamanizya muswaangano wesu, kwiinda mukwiimba lwiimbo lupya ilujisi mutwe wakuti “Bwami Nkobuli Kale—Abuboole!” Lwiimbo oolu, ilwakazwa amuswaangano wamwaka iwakacitwa ino-ino, lwakaanzwa ikutondezya kuti yakkwana myaka iili 100 kuzwa ciindi nobwakatalika kulela Bwami.
9 Masimpe, nyimbo zipya “zintu zibotu” kuzwa kuli Jehova. (Mt. 12:35a) Atube amakanze aakwiiya nyimbo eezyi zipya akwiimba kuzwa ansi aamoyo, ikutembaula alimwi akulemeka Leza wesu!—Int. 147:1.