Sena Ndileelela Kukambauka?
1. Ino nkaambo nzi ncotuteelede kulitenga caboola kumakani aakweelela kwesu kuba bakambausi?
1 Ikuti naa kuli nomwakalibuzyide mubuzyo uuli boobo, tamweelede kulibilika pe! Taluli lwiiyo lwakumubili naa busongo bwakuzyalwa abwalo ibupa kuti tweelele kuba bakambausi. Basikwiiya bakusaanguna bamwi bakali kwaambwa kuti ‘mbantu buyo ibatakaiya.’ Nokuba boobo, bakali kukambauka makani mabotu munzila iigwasya akaambo kakuti bakali kutobela cikozyanyo ca Jesu amoyo woonse.—Inc. 4:13; 1 Pet. 2:21.
2. Ino Jesu wakali kuyiisya buti?
2 Jesu Mbwaakali Kuyiisya: Jesu wakali kuyiisya munzila ngubauba alimwi iitakatazyi kumvwa. Mibuzyo njaakali kubuzya, zikozyanyo nzyaakali kubelesya alimwi amajwi aantalisyo mauba-uba akali kupa kuti baswiilizi bakwe babikkile maano kapati. (Mt. 6:26) Wakali kubabikkila maano bantu. (Mt. 14:14) Kunze lyaboobo, Jesu wakali kwaambaula cabusicamba alimwi acanguzu akaambo kakuti wakalizyi kuti Jehova ngowakamupa mulimo anguzu zyakukambauka.—Lk. 4:18.
3. Ino mbuti Jehova mbwatugwasya notubeleka mulimo wakukambauka?
3 Jehova Ulatugwasya: Kwiinda mu Jwi lyakwe alimwi ambunga yakwe, Mwiiyi wesu Mupati ulatuyiisya kuti tuzwidilile mumulimo wakukambauka makani mabotu aa Bwami. (Is. 54:13) Mbokunga Jehova wakayobola makani aajatikizya kuyiisya kwa Jesu, tulakonzya kwaalanga-langa akuzitobela nzila nzyaakali kubelesya. Jehova ulatupa muuya uusalala alimwi ulatuyiisya kwiinda mumiswaangano yambungano. (Joh. 14:26) Kuyungizya waawo, ulatupa basikumwaya basimide ibatugwasya kuba bakambausi bazwidilila.
4. Ino nkaambo nzi ncotweelede kulimvwa kuti tuleelela kukambauka makani mabotu kubantu?
4 Tujisi twaambo tunji tweelede kutupa kulimvwa kuti tuleelela kukambauka akaambo kakuti “buzulizi bwesu buzwa kuli Leza.” (2 Kor. 3:5) Notuzumanana kusyoma Jehova akubelesya zyaabilo zyakwe zibotu, ‘tuyoozulila kukumana milimo mibotu yoonse.’—2 Tim. 3:17.