Sena Liso Lyanu Ndyabuuya?
1. Ino caamba nzi kuba ‘aliso lyabuuya’?
1 Micito yesu yeendelezyegwa azyintu nzyotubona. Jesu wakaamba masimpe naakamba kuti: “Nkaambo kaako liso lyako kuti kalili sibuuya, mubili wako woonse ulazula mumuni.” (Mt. 6:22) Kuti liso lyesu lyakumuuya kalili ‘lyabuuya,’ nkokuti ligamikidwe amakanze omwe—kucita kuyanda kwa Leza. Tubikka Bwami mubusena bwakusaanguna alimwi tatunyonganizyigwi azyintu zyakumubili zitayandiki kapati naa milimo imwi iikonzya kunyonganya mulimo wakukambauka.
2. Ino ncinzi cikonzya kunyonganya mbotuzilanga zyintu, pele ncinzi cikonzya kutugwasya?
2 Ncokuyandika Kulilingula: Mbotuzilanga zyintu kulakonzya kunyonganizyigwa amakani ngobaambilizya basimakwebo muzipekupeku naa notubona zyintu nzyobajisi bamwi. Katutaninga bweza ntaamu yakuula cintu cipati cikonzya kutumanina ciindi, mali naa nguzu, inga cainda kugwasya ‘kukkala ansi akubalila mali’ kwiinda mukulibuzya mubuzyo wakuti, ‘Sena eeci cintu inga candigwasya kumubelekela Jehova naa inga candinyonganya?’ (Lk. 14:28; Flp. 1:9-11) Alimwi cilainda kugwasya kulilingula ciindi aciindi kutegwa tubone mbotukozya kuubya-ubya buumi bwesu kutegwa tuyungizye ciindi ncotubeleka mumulimo wamumuunda.—2 Kor. 13:5; Ef. 5:10.
3. Ino ncinzi ncotukonzya kwiiya kumucizyi wakaubya-ubya buumi bwakwe kutegwa ajane ciindi cakubeleka mumuunda?
3 Mucizyi umwi naakatalika kucita bupainiya bwaciindi coonse, wakasala kuzumanana kubeleka mulimo wakumubili nokuba kuti mulimo wakubeleka cisela cabuzuba nowakamugwasya kujana zyintu ziyandika. Mukuya kwaciindi wakaamba kuti: “Taakwe muntu uukonzya kubelekela bami bobilo. Ndakacileka kuyandisisya zyakulikkomanisya kutegwa ndibikkile maano kuzyintu ziyandika kapati. Ndakabona kuti zyintu zyakumubili zilamana akuti tazyileti lukkomano lwini-lwini.” Bukkale bwakwe bwakapa kuti ajane mulimo wakali kukonzya kumugwasya kuzumanana mumulimo wabupainiya bwaciindi coonse.
4. Ino nkaambo nzi ncotweelede kuzumanana kuba aliso lyabuuya lino?
4 Ikuzyiba kuti mamanino aswena kapati kweelede kutupa kuzumanana kuba aliso lyabuuya. Mazuba mbwaayabukwelenkana atondezya kuti mamanino abweende oobu bwazyintu ali afwaafwi akuti nyika mpya ya Leza yaswena kapati. (1 Kor. 7:29, 31) Kwiinda mukubikkila maano kumulimo wakukambauka, tulakonzya kulifwutula tobeni abaabo batuswiilila.—1 Tim. 4:16.