Amube Aliso Lyabuuya
1. Ino caamba nzi kuba aliso lyabuuya, alimwi ino nkaambo nzi ncociyandika eeci?
1 Mu Mulumbe wakwe waa Cilundu, Jesu wakatondezya nguzu zipati nzyolijisi liso lyacikozyanyo naa lyakumuuya mubuumi bwesu boonse. Wakati: “Nkaambo kaako liso lyako kuti kalili sibuuya, mubili wako woonse ulazula mumuni. Anukuti liso lyako kuti kalili litavu, mubili wako woonse ulasia.” (Mt. 6:22-24) Liso lyabuuya ndiso ligaminide buyo amakanze omwe—ikucita luyando lwa Leza—ilitanyonganizyigwi akaambo kakuciindizya kulibilika kujatikizya zintu zyakumubili. (Mt. 6:19-21, 24-33) Ino ncinzi cinga catugwasya kuzumanana kuba aliso lyabuuya?
2. Nkuzilanga munzila yeelede kuli buti zintu zyakumubili nkolikulwaizya Jwi lya Leza?
2 Ikukkutila Azintu Nzyotujisi: Ikujanina nzyouyandika mukwasyi mmukuli wamu Magwalo. (1 Tim. 5:8) Pele eeci tacaambi kuti lyoonse tweelede kuyandaula zintu zibotu alimwi zipya. (Tus. 27:20; 30:8, 9) Muciindi caboobo, Magwalo atukulwaizya kuzulila twanoojisi “cakulya acakulivumba,” nkokuti zintu zyamubuumi ziyandika. (1 Tim. 6:8; Heb. 13:5, 6) Ikutobela malailile aaya inga kwatugwasya kuba aliso ligaminide.
3. Ino ncinzi cikonzya kutugwasya kutaliminya amikuli yakuliyandila?
3 Tunoocita camaano ikuti naa tiitwaliminya azikwelete ziteelede alimwi ambono naa zintu zitola ciindi cinji akubikkilwa maano kapati. (1 Tim. 6:9, 10) Mbuti mbotunga twacicita eeci? Nomuyeeya kubweza ntaamu imwi, amwaapailile makani akulanga-langa mubwini naa cintu eeco inga canyonganya zintu zyakumuuya. Amukanze kubikka zintu zyakumuuya mubusena bwakusaanguna mubuumi bwanu.—Flp. 1:10; 4:6, 7.
4. Nkaambo nzi ncotweelede kujana nzila zyakuubya-ubya bukkale bwesu?
4 Amubuubye-ubye Bukkale Bwanu: Lugwasyo alumwi lwakukazya kuyandisya lubono nkusoleka kuubya-ubya bukkale bwanu. Imukwesu umwi iwakajana kuti mukwasyi wakwe wakali kukonzya kupona kabotu kabanyina mpasya zinji wakati: “Lino ndacikonzya kucita zinji mumbungano kubelekela bakwesu. Ndasyoma kuti Jehova ulabaleleka babelesi bakwe boonse nobabikka bukombi bwakasimpe kumbele lyazintu nzyobayanda beni.” Sena inga mwajana zilongezyo zinji kwiinda mukuubya-ubya bukkale bwanu?
5. Nkaambo nzi ncokuyandika kusoleka lyoonse kutegwa katujisi liso lyabuuya?
5 Tuyandika kusoleka lyoonse kutegwa tukazye kuyunga kwa Saatani, kwanyika yakwe iiyandisya lubono alimwi akwamibili yesu iitalondokede. Muciindi cakulekela meso eesu kutasitikila, atwaalanzye buyo kukucita luyando lwa Leza alimwi akubulangizi bwesu bubotu bwabuumi butamani.—Tus. 4:25; 2 Kor. 4:18.