Sena Bana Banu Balilibambilide?
1. Nkaambo nzi ncociyandika kuti bana bacikolo kabalibambilide?
1 Bakamboni ba Jehova bacili bana balajana buyumuyumu busiyene-siyene. Teemu iili yoonse ilaboola abuyumuyumu bwayo alimwi amapenzi. Nokuba boobo buyumuyumu buli boobo bupa coolwe ‘cakulungulula kasimpe.’ (Joh. 18:37) Sena bana banu balilibambilide lyoonse?
2. Kutegwa balibambile, nzyintu nzi nzyobeelede kuzyiba bana banu?
2 Sena bana banu balizyi kabotu ncocaamba kutola lubazu muziyanza zyacisi alimwi akusekelela mazuba aakulyookezya aajatikizyidwe abukombi bwakubeja, alimwi ncocitaluzi kucita oobo? Sena balizyi ncobeelede kucita kuti beenzinyina babasungilizya kutola lwiiyo lwaatala, kusyabana, alimwi akunywa bukoko naa kubelesya misamu iikola? Sena inga baamba buyo kuti micito eeyi tayeendelani abukombi bwabo, naa balizyi mbobakonzya kupandulula nzyobasyoma?—1 Pe. 3:15.
3. Mbuti bazyali mbobakonzya kubelesya ciindi Cakukomba Mumukwasyi kugwasya bana babo kulibambila?
3 Amubelesye Ciindi Cakukomba Mumukwasyi: Cakutadooneka, teemu yoonse munoobandika abana banu kuti bajana mapenzi. Kubandikila limwi makani aajatikizya mapenzi ngobakonzya kujana kucikolo bana banu kulakonzya kubagwasya kuba basicamba. Mulakonzya kubelesya ciindi comwe naa zyobilo zya Kukomba Mumukwasyi. Mulakonzya kubabuzya bana banu icibapa kulibilika kapati nobayeeya zyakuunka kucikolo alimwi. Twaambo ntomwakabandika myaka yainda mulakonzya kutubandika alimwi lino mbwaanga bana banu bakomena alimwi balakonzya kumvwisya. (Int. 119:95) Mulakonzya kucita zitondezyo kwiinda mukulicengeezya kuba mwiiyi, sikupa lulayo, naa sicikolonyina. Amubayiisye bana banu kuzyiba mbobakonzya kwiingula kwiinda mukubelesya Bbaibbele alimwi ambobakonzya kubelesya bbuku lya Kukambitsirana alimwi alya Achichepere Akufunsa. Umwi muzyali wakali kucita zitondezyo abana bakwe kubagwasya kubona mbobakonzya kusikila bamayi babo bapya ciindi nobajalula cikolo kutegwa babazyibye kuti Mbaakamboni ba Jehova.—Amubone Ngazi Yamulindizi, ya December 15, 2010, peeji 3-5.
4. Ino bazyali basongo bayoocita nzi?
4 Buyumuyumu mbubaswaanganya kucikolo Banakristo bakubusi mazuba aano aakumamanino buyaabwiindila ‘kukatazya ncobeni.’ (2 Ti. 3:1) Bazyali basongo bayoosola kuyeeyela mapenzi bana babo ngobakonzya kujana kucikolo alimwi bayoobagwasya bana babo kutegwa bakacikonzye kwaazunda. (Tus. 22:3) Teemu imbi kaitanatalika, mweelede kucita zyoonse nzyomukonzya kutegwa mubagwasye bana banu kulibambila.