Amulibambile Kukambauka Kucikolo
1. Ino ncoolwe nzi ncomujisi kucikolo?
1 Nokuba kuti mwakatalika mwaka uuno naa mwakatalika kaindi cikolo, kuli buyumuyumu mbomujana nywebo nobakubusi Banakristo. Nokuba boobo, mulaacoolwe “cakulungulula bwini.” (Joh. 18:37) Sena mulilibambilide kupa bumboni?
2. Ino ncinzi cinga camugwasya kulibambila kukambauka kucikolo?
2 Kutegwa muzwidilile mubuumi bwanu, Jehova, muzike musyomesi uucenjede alimwi abazyali banu bamuyiisya zyintu zinji izikonzya kumugwasya. (Tus. 1:8; 6:20; 23:23-25; Ef. 6:1-4; 2 Tim. 3:16, 17) Kakunyina kudooneka, ecino ciindi mulibuzyi buyumuyumu mbomukonzya kujana kucikolo. Kwiinda mulwiiyo lwabuna Leza alimwi amubukkale momukonzya kulijana, amulibambile kupa bumboni. (Tus. 22:3) Amubikkile maano kumalailile aamu Magwalo aajanwa mumabbuku obilo aakuti “Zimene Achinyamata Amafunsa” alimwi amuzibalo izili boobo zilembwa mu Sinsimuka!
3. Ino mmuubukkale buli buti momukonzya kupa bumboni?
3 Cilawo cenu cilibedelede cimupa coolwe cakukambauka munzila zinji. Bamwi nobabona nsamino yanu iili kabotu alimwi ambomulibamba, mbomulilemeka alimwi ambomwaambaula, mbomubalemeka basicikolonyoko alimwi abamayi, ambomucita kabotu mucikolo alimwi akuti mulangilwa kuti muyoozwidilila mubuumi, bamwi balakonzya kubuzya kuti, “Ino nkaambo nzi ncomwiindene abamwi?” (Malk. 3:18; Joh. 15:19) Eeci cilakonzya kumupa coolwe cakuti mupe bumboni akupandulula nzyomusyoma. (1 Tim. 2:9, 10) Teemu ateemu, ndiza mujana buyumuyumu bwakusungilizyigwa kutola lubazu muziyanza zyacisi amumazuba aakulyookezya. Ikuti naa bamubuzya kaambo ncomutatoleli lubazu muzyintu eezyi, sena muya kwaamba kuti, “Tatuzumizyidwe kucita boobo mucikombelo cesu; Ndili umwi wa Bakamboni ba Jehova,” naa muyoobelesya coolwe eeci kubakambaukila makani aajatikizya Taateesu siluyando, Jehova? Kulibambila kabotu kweelana amalailile aazwa kuli Jehova kuyoopa kuti kamulibambilide kupa bumboni kuli basicikolonyoko, bamayi alimwi akubantu bamwi.-1 Pet. 3:15.
4. Ino ncinzi cimupa kusyoma kuti mulakonzya kuzwidilila kucikolo?
4 Nokuba kuti mulakonzya kulibilika akaambo kakuba kucikolo, amuzyibe kuti kuli bantu banji ibayanda kuti muzwidilile mulwiiyo lwenu. Kuyungizya waawo, tulakkomana andinywe akaambo kazyoolwe nzyomukonzya kuba aanzizyo zyakukambauka mucilawo cenu cilibedelede. Aboobo amube basicamba alimwi akulibambila kukambauka kucikolo!