Mutawayiwayi Kukambauka
1. Ncinzi ciyandika busicamba, alimwi nkaambo nzi?
1 Sena kuli nomwakawayawaya kukambauka kucikolo akaambo kakuyoowa kufwubaazyigwa? Ciyandika busicamba kukambauka, kwaambisya kuti kamulaansoni. Ncinzi ciyoomugwasya?
2. Caboola kumakani aakukambauka kucikolo, ino bupampu bujatikizyidwe buti?
2 Amubelesye Bupampu: Nokuba kuti mulijisi coolwe cakukambauka kucikolo, kamuyeeyede kuti tamukonzyi kutalisya mubandi kubantu boonse mbuli mbomucita nomukambauka kuŋanda aŋanda. Amubelesye bupampu kuzyiba nomukonzya kwaambaula. (Muk. 3:1, 7) Mubandi wamukkilasi naa mulimo wakukkilasi ngomwapegwa kulemba ulakonzya kumupa coolwe cakwaamba nzyomusyoma. Ambweni sicikolonyoko ulakonzya kumubuzya kaambo ncomutatoleli lubazu muzyintu zimwi. Banakristo bamwi bazyibya bamayi babo kumatalikilo aamwaka kuti Mbaakamboni ba Jehova alimwi akubapa mabbuku aapandulula nzyotusyoma. Bamwi balasiya mabbuku amadesiki aabo kutegwa basicikolonyina bababuzye mibuzyo kujatikizya mabbuku aayo.
3. Mbuti mbomukonzya kulibambila kukambauka kucikolo?
3 Amulibambile: Ikuti mwalibambila, muyooba basicamba. (1 Pe. 3:15) Aboobo amusole kweezeezya mibuzyo njomukonzya kubuzyigwa, alimwi akuyeeya mbomukonzya kuyiingula. (Tus. 15:28) Ikuti kacikonzyeka, ciindi nomuunka kucikolo kamweenda a Bbaibbele lyanu amabbuku masyoonto mbuli Reasoning, a Young People Ask mucibbeeke canu cakucikolo, alimwi amabbuku amwi aamba kuti zyintu zyakalengwa buya kutegwa mwaabelesye kuti kwayandika. Amubalombe bazyali banu kuti babikkilizye azitondezyo ciindi nomukomba mumukwasyi.
4. Nkaambo nzi ncomweelede kuzumanana kukambauka kucikolo?
4 Amuzilange Munzila Iili Kabotu Zyintu: Mutayeeyi kuti basicikolonyoko banakumufwubaazya ciindi coonse nomwaambaula kujatikizya kasimpe. Bamwi banakumulombozya akaambo kabusicamba bwanu alimwi balakonzya kumuswiilila. Pele tamweelede kutyompwa kuti naa kunyina uumuswiilila. Jehova uyakukkomana akaambo kakuti mwasoleka. (Heb. 13:15, 16) Amuzumanane kumulomba kuti amugwasye ‘kuzumanana kukanana cabusicamba.’ (Mil. 4:29; 2 Ti. 1:7, 8) Amuyeeye buyo mbomukonzya kukkomana kuti naa umwi waswiilila nzyomumwaambila. Ambweni muntu ooyo mukuya kwaciindi ulakonzya kuba mubelesi wa Jehova!