Nobakubusi—Amubikkile Maanu Kulwiiyo Lwanu
1 Mulimvwa buti nocasika ciindi cakupilukila kucikolo kwamana kulyookezya? Sena inga mulayandisisya kunjila mumwaka umbi wakuyiisigwa? Sena iziindi zibotu nzyomujana kucikolo zyakwaambila basicikolonyoko alimwi abamayi kasimpe muyoozibelesya? Tusyomede kuti muyanda kusoleka mpomugolela kucita kabotu kucikolo.
2 Amube Sicikolo Mubotu: Ikuti kamulibambila kabotu lyoonse nomwiiya ziiyo mukkilasi alimwi akubikkila maanu kapati, muyoogwasigwa cini-cini. Amwiisungwaalile milimo yakucikolo iicitilwa kuŋanda, pele itanyonganyi zintu zyateokrasi.—Flp. 1:10.
3 Amutalike teemu mpya kwiinda mukubala broshuwa ya Bakamboni ba Jehova Kumakani Aalwiiyo. Mpoonya, nywebo naa bazyali banu mweelede kuyoopa broshuwa yomwe kumwiiyi omwe-omwe. Amubazibye kuti imibuzyo iili yoonse njobanga kabajisi iyooingulwa. Eci ciyoobagwasya kuzizyiba kabotu-kabotu injiisyo akusyoma kwanu kutegwa batakamunyonganyi baakujana mucita ncomwakayiisigwa. Alimwi eci ciyoocitya kuti bamayi basyome kuti nywebo alimwi abazyali banu muyanda kweendelana ambabo ciindi nobamugwasya kujana lwiiyo luyandika.
4 Amube Kamboni Mubotu: Ino ncomutaboneni cikolo canu kuba cilawo cenu mubumboni bwamukwiizya? Mumwaka uboola, muyoobaa ziindi zilibedelede zyakupa bumboni. Mulaaluzibo lubotu lwakumuuya lwalo ilunga ikuti naa mwalubelesya kwaambila bamwi, lulakonzya ‘kumufwutula nobeni alimwi abaabo ibamuswiilila.’ (1 Timo. 4:16, Ci) Kwiinda mukulilemeka kabotu lyoonse munzila ya Bunakristo alimwi akupa bumboni kufwumbwa ciindi nokweelede kucita boobo, muyooligwasya nobeni abamwi.
5 Imukwesu umwi mukubusi wakakambauka kwiinda mukwiizya kuli basicikolonyina kucikolo nkwaakali kwiiya. Akati kabaabo ibakaatambula makani aakwe kwakali umwi wacikombelo ca Katolika, uutasyomi kuti Leza nkwali, iwakali kusampula akupukula baabo ibasyoma muli Leza alimwi amukubusi umwi iwakali kufweba citaambiki akunywa bukoko kapati. Imukwesu oyu mukubusi wakagwasya basimuselanyina boonse antoomwe ibali 15 kulyaaba akubbapatizigwa!
6 Aboobo, nobakubusi amuyume akujatisya mulwiiyo lwanu alimwi akubelekela mucilawo canu cilibedelede. Ikuti mwacita obo muyoogwasigwa kapati kwiinda mukuunka kucikolo.