Tatuleki Kubeleka
1. Ino tuzyiba buti kuti bakambausi bamumwaanda wamyaka wakusaanguna tiibakali kuleka kubeleka?
1 Bakambausi basungu bamumwaanda wamyaka wakusaanguna bakaambilizya makani mabotu “cakutaleka” kufwumbwa buyo nkobakali kujanika bantu. (Mil. 5:42) Aboobo, ciindi nibakali kuyaabukambauka ŋanda aŋanda taakwe nibakali kwiindilila bantu bakali munzila kakunyina kubakambaukila abalo. Taakwe nibakali kwiimpya coolwe cakukambauka kwamukwiizya ciindi nibakali kuula zyintu kumusika bamanizya mulimo wabukambausi. Mbubwenya mbuli Jesu, tiibakali kuleka kubeleka.—Mk. 6:31-34.
2. Ncinzi cijatikizyidwe mukupona kweelana azyina lyesu?
2 Tweelede Kulibambila Kukambaukila Bamwi Ciindi Coonse: Izyina lyesu lyakuti, Bakamboni ba Jehova, talipandululi buyo mulimo ngotucita, pele lipandulula mbotubede. (Is. 43:10-12) Aboobo tulilibambilide lyoonse kuliiminina kumuntu uuli woonse uukonzya kutubuzya kaambo kajatikizya bulangizi mbotujisi, noliba leelyo notutali mubukambausi bwaŋanda aŋanda. (1 Pe. 3:15) Sena muleezyeezya bukkale bukonzya kumupa coolwe cabukambausi bwamukwiizya akuyeeya nzyomukonzya kwaamba? Sena mulabwezelezya mabbuku ngomukonzya kwaabila bantu batondezya luyandisisyo? (Tus. 21:5) Sena mucita buyo bukambausi bwaŋanda aŋanda, naa mulamwaya mulumbe wamakani mabotu kubantu bali mumasena aambi kuti bukkale kabuzumizya?
3. Ino kukambauka “kubuleya” caamba nzi alimwi nkaambo nzi ncokuyandika kapati?
3 Kukambauka “kubuleya”: Eeci caamba kukambauka mumigwagwa, musiigwa myootokala, mumasena aakulyookezyezya, kucitilwa makwebo alimwi amumasena aambi. Mwaapostolo Paulo wakaamba kuti wakakambauka “kubuleya” alimwi akuŋanda aŋanda. (Mil. 20:20) Masimpe kuti bukambausi bwaŋanda aŋanda bwazumanana kuba cibeela cipati alimwi nenzila yakusikila bantu amulumbe wa Bwami iibeleka kabotu kwiinda. Nokuba boobo, bakambausi bamumwaanda wamyaka wakusaanguna bakali kubikkila maano kapati kubantu kuleka maanda. Bakabelesya coolwe cili coonse ncibakajisi kuti bakanane kujatikizya kasimpe—kubuleya, mukwiizya alimwi akuŋanda aŋanda. Atuzumanane kuba amakanze ngeena aaya kutegwa tuuzuzikizye cakumaninina mulimo wesu.—2 Ti. 4:5.