Kukambauka Kuŋanda Aŋanda
1. Ino mubuzyo nzi uuboola kujatikizya bukambausi bwakuŋanda aŋanda, alimwi ino nkaambo nzi?
1 “Aabo bazibide muzibeela zisiyene-siyene zyakumwaya Kasimpe bayoozumina kuti mulimo wakukambauka kuŋanda aŋanda kwiinda mukubelesya mabbuku aategwa MILLENNIAL DAWN (aayo aakazooitwa kuti Studies in the Scriptures) mumazuba aano, ninzila mbotu kapati yakukambauka Kasimpe.” Aaka kaambo kakazwa mumagazini yakali kwiitwa kuti Zion’s Watch Tower ya July 1, 1893, kakakankaizya bubotu bwabukambausi bwakuŋanda aŋanda. Bantu munyika yoonse bukambausi oobu babubona kuti ncilengwa caba Bakamboni ba Jehova. Sena cibeela eeci cicigwasya mbokunga muzisi zimwi catalika kuyaabukatazya kubajana bantu aŋanda?
2. Ino ntwaambo nzi twamu Magwalo twaamba zyabukambausi bwakuŋanda aŋanda?
2 Mbwamu Magwalo Alimwi Bulayandika: Bukambausi bwakuŋanda aŋanda buzwa mu Magwalo. Jesu wakalailila basikwiiya bali 70 kwiinka bobile-bobile kumaanda aabantu. (Lk. 10:5-7) Mazuba masyoonto kuzwa ciindi naakafwa Jesu, Bbaibbele lyaamba boobu kujatikizya basikwiiya bakwe: “Mazuba oonse tabakalekede kwiisya akukambauka muntempele amumaanda.” (Inc. 5:42) Awalo mwaapostolo Paulo wakayiisya cabusungu kuŋanda aŋanda.—Inc. 20:20.
3. Ino mbubotu nzi bwakukambauka kuŋanda aŋanda?
3 Bukambausi bwakuŋanda aŋanda bwazumanana kuba cibeela ciyandika cakumwaya makani mabotu mazuba aano. Bulatugwasya kubeleka calukamantano ‘mukuyandaula’ baabo beelede. (Mt. 10:11) Bantu kanji-kanji balalikwaya kapati nobali aŋanda. Kubandika ambabo camulomo mpande—kumvwa jwi lyabo, kubona mbobaboneka kubusyu alimwi akubona lubuwa lwabo mboluboneka—kutupa kuziba nzyobayandisya alimwi anzyobabikkila maanu. Kutupa ciindi cibotu cakubandika ambabo lyoonse.
4. Ino mbuti mbotukonzya kupa kuti bukambausi bwakuŋanda aŋanda kabugwasya kapati?
4 Amucince Bukkale Bwanu: Mwaapostolo Paulo wakalilisungwide kucinca bukkale bwakwe “nkaambo ka-Makani Mabotu.” (1 Kor. 9:23) Ambweni inga twakonzya kucinca mulongo wesu kutegwa katukambauka ciindi bantu banji nobalangilwa kujanika aŋanda, mbuli ciindi cakumazuba, mazuba aamu Mujibelo amu Nsondo naa mazuba aakulyookezya. Amwiilembe minzi aatajanika muntu akusoleka kuyoojokela buzuba bumbi mukati kansondo naa ciindi cimbi mubuzuba mbubwenya oobo.
5. Ino mbuti aabo baciswa-ciswa mbobakonzya kubikkilizigwa mumulimo wakuŋanda aŋanda?
5 Nobaba baabo baciswa-ciswa inga bakonzya kutola lubazu mukukambauka kuŋanda aŋanda. Ambweni inga twakonzya kubamba bubambe bwakwiinka ambabo kumaanda aali afwaafwi, kubapa kuti bacikonzye kubeleka cakuteendesya. Umwi mucizi wakali kufwundilila alimwi wakali kukonzya kusika buyo aŋanda yomwe mucisela cawoola acimwi. Nokuba boobo, wakakkomana kaka akukkutila kapati naakamana kutola lubazu mubukambausi bwamukakamu!
6. Ino nkaambo nzi bukambausi bwakuŋanda aŋanda ncotweelede kubucita kuba cibeela camulimo wesu uucitwa lyoonse?
6 Bantu banji bali mbuli mbelele bacijanwa kwiinda mumulimo wakuŋanda aŋanda. Sikumwaya umwi wakakonkomona acitendele, eelyo wakaambilwa kuti: “Amunjile. Ndilimuzi nywebo. Ndali kupailila kuti Leza atume muntu umwi kuzoondigwasya, eelyo mpoonya ndamvwa muntu uukonkomona acitendele. Leza wandimvwa, eelyo wamutuma.” Zicitika eezi mbumboni bwakuti Jehova ulagwasilizya kucibeela eeci cabukambausi. (Mt. 11:19) Amukanze kuti bukambausi bwakuŋanda aŋanda bube cibeela camulimo wanu uucitwa lyoonse.