Amucibelesye Kabotu Ciindi Canu Mubukambausi
Bakamboni ba Jehova bakabeleka mawoola aali 1,945,487,604 mumulimo wakukambauka mumwaka wamulimo wa 2014—eeci ncitondezyo cakuti tulilyaabide kubeleka canguzu mumulimo wa Jehova. (Int. 110:3; 1Kor. 15:58) Mbwaanga “ciindi casyaala caceya,” sena inga tiicakonzyeka kubelesya ciindi cesu notuli mumulimo kutegwa tubandike abantu banji?—1Kor. 7:29.
Kutegwa tucibelesye kabotu ciindi cesu mubukambausi, tweelede kunyoneka. Mucikozyanyo, ikuti kanji-kanji kulainda woola lyomwe naa kwiinda waawo kakunyina kubandika amuntu mucibeela cimwi camulimo, sena inga tiitwacinca zintu kutegwa tujane bantu banji bakubandika limwi? Bukkale bulaindana kweelana abusena. Nokuba boobo, nzila zitobela zilakonzya kumugwasya kucibelesya kabotu ciindi ncomujisi kutegwa ‘mutanikuumi buyo muwo.”—1Kor. 9:26.
Bukambausi Bwakuŋanda Aŋanda: Kwamyaka minji, basikumwaya bali kutalika bukambausi bwabo kwiinda mukukambauka kuŋanda aŋanda. Nokuba boobo, mbwaanga banji balabeleka mafwumofwumo kusikila kumazuba, sena inga tamusoleki kukambauka kuŋanda aŋanda kumangolezya, ciindi bantu banji nobalyookezya aŋanda? Mafwumofwumo kusikila kumazuba, bukambausi bwamumugwagwa naa bwamumasena mucitilwa makwebo bulakonzya kuzwidilila.
Bukambausi Bwakubuleya: Tutebulu naa twakubikkila mabbuku twakukuba tweelede kubikkwa mumasena mwiinda bantu banji mucilawo cambungano. (Amubone Mulimo Wesu wa Bwami wamu September 2013, peeji 2.) Ikuti naa bantu baceya kubusena ikucitilwa bukambausi bwakubuleya, Kkomiti Yamulimo Yambungano inga yasala kuti twakubikkila mabbuku twakukuba naa tutebulu tulonzyegwe akutolwa kubusena kwiinda bantu banji.
Nyendo Zyakupilukila Alimwi Aziiyo zya Bbaibbele: Sena inga cakonzyeka kucita nyendo zyakupilukila naa kusololela ziiyo zya Bbaibbele aciindi nomutajani kapati bantu nomucita cibeela cimwi cabukambausi? Mucikozyanyo, ikuti bukambausi bwakuŋanda aŋanda bweenda kabotu mu Mujibelo mafwumofwumo, sena inga tiimwasololela ziiyo zya Bbaibbele masyikati naa kumazuba?
Nokuba kuti tulabala ciindi lyoonse notwakambauka, lukkomano lwesu luvwula ikuti katugwasya bantu banji. Ikuti mwajana kuti nzila imwi yabukambausi taizwidilili aciindi cimwi, amusole kubelesya nzila imbi. Amupaile kuli Jehova, “Simalelo wabutebuzi,” kutegwa amugwasye kucibelesya kabotu ciindi ncomujisi nomuli mubukambausi!—Mt. 9:38.