Sena Inga Mwatola Lubazu Mubukambausi Bwakumangolezya?
1. Kweelana asikwiiya Bbaibbele umwi, ndiilili mwaapostolo Paulo naakali kukambauka kuŋanda aŋanda?
1 Kweelana abbuku lyakuti Daily Life in Bible Times, mwaapostolo Paulo wakali kutola lubazu mumulimo wakukambauka kuŋanda aŋanda “kuzwa kuma 16:00hrs kusikila masiku.” Tatuzyi naa oobu Paulo mbwaakali kucita lyoonse, pele tulizyi kuti Paulo wakalilyaabide ‘kucita zyintu zyoonse akaambo kamakani mabotu.’ (1 Ko. 9:19-23) Eeci cakali kubikkilizya akulibambila kabotu kutegwa atole lubazu mubukambausi bwakuŋanda aŋanda ciindi naakali kukonzya kubandika abantu banji.
2. Nkaambo nzi kumangolezya ncocili ciindi cibotu cakutola lubazu mumulimo wakukambauka?
2 Basikumwaya mumasena manji bajisi cilengwa cakukambauka kuŋanda aŋanda mafwumofwumo mukati kansondo. Pele kubusena nkomukkala, sena eeci inga kacili ciindi cibotu kubusena nkomukkala? Mupainiya umwi wakaamba boobu kujatikizya cilawo cakwe: “Bantu tabajaniki aŋanda ciindi camasikati. Pele bantu banji balajanika aŋanda ciindi camangolezya.” Bukambausi bwakumangolezya inga bwatupa coolwe, kwaambisya, cakukambaukila bamaalumi makani mabotu. Kanji-kanji bamukamwiniŋanda aciindi eeci inga baliliibide alimwi inga balayanda kubandika. Ikuti kacigwasya kucita boobo, baalu beelede kubikka bubambe bwakuba aamiswaangano yamulimo wamumuunda kumangolezya.
3. Ino inga twabubelesya buti bupampu ciindi notutola lubazu mubukambausi bwakumangolezya?
3 Amubelesye Bupampu: Cilayandika kapati kubelesya bupampu mwanootola lubazu mubukambausi bwakumangolezya. Mucikozyanyo, kuti mwabona kuti eeci tacili ciindi cibotu kuswaya mukamwiniŋanda mbuli aciindi cacakulya cakumangolezya, inga cabota kubalomba kuti mukaboole kabotu alimwi. Ikuti naa kwasiya, amwiime abusena mukamwiniŋanda mpakonzya kumubona, alimwi mweelede kufwambaana kulipandulula akumwaambila ncomwazyida. Alimwi ncamaano kweenda nyobilo naa mutubunga alimwi akubelekela mumigwagwa iijisi malaiti momutakonzyi kulijana nyolikke. Mutasikili bantu ciindi camasiku maningi cakuti mwanyonganya bamukamwiniŋanda ibayanda kuunka kukoona. (2 Ko. 6:3) Ikuti mucilawo momukkala kamuyoosya kwasiya, amukambaukile mumo kakutanasiya.—Tus. 22:3.
4. Ino zilongezyo nzi ziboola akaambo kakutola lubazu mubukambausi bwakumangolezya?
4 Zilongezyo: Bukambausi bulakkomanisya kapati kuti bantu kabajanika aŋanda. Ikuti twacikonzya kupa bumboni, inga catupa coolwe cakuti tugwasye bantu kuti “bafwutulwe akuba aluzyibo lwini-lwini lwakasimpe.” (1 Ti. 2:3, 4) Sena inga mwacinca mulongo wanu kutegwa mutole lubazu mubukambausi bwakumangolezya?