Sena Inga Mwaucinca Mulongo Wanu Wabukambausi?
1. Nkaambo nzi ncotweelede kuucinca mulongo wesu wabukambausi?
1 Mbotuli Banakristo beni-beni, twakazumina kutambwa kuba “basikuzuba bantu.” (Mt. 4:19) Mbubwenya mbuli basikuzuba nswi, tuyoojana zilongezyo mumulimo wakuzuba bantu ikuti twabamba mulongo waciindi cakukambauka ciindi bantu nobajanwa aŋanda. Kumazuba alimwi akumangolezya, bantu banji inga bali aŋanda. Kanji-kanji inga tabajisi bubi alimwi inga balayanda kutambula beenzu. Sena inga mwaucinca mulongo wanu kutegwa mukambauke kuciindi eeco?—1 Kor. 9:23.
2. Ninzila nzi zimwi nzyotukonzya kubelesya kutegwa tusikile bantu banji amakani mabotu?
2 Bukambausi Bwakumangolezya: Kulibambila kakucili ciindi kuti tukambauke kumangolezya kulakonzya kutugwasya kukambaukila bantu banji makani mabotu. (Tus. 21:5) Ibakubusi balakonzya kukambauka bazwa kucikolo. Ibamwi balakonzya kucita oobo bazwa kumilimo. Tubunga twaciiyo cabbuku tumwi tulakonzya kuba abubambe bwakukambauka kwawoola lyomwe kacitanatalika ciiyo cabbuku caansondo.
3. Muunzila nzi momukonzya kukambauka ciindi cakumazuba alimwi akumangolezya mucilawo canu?
3 Kukambauka kuŋanda aŋanda iciindi cakumazuba alimwi akumangolezya kulakonzya kupa kuti tubandike abaabo batajaniki lyoonse aŋanda. Muzilawo zinji, bukambausi bwamumugwagwa alimwi anzila zimwi zyabukambausi bwakubuleya bulakonzya abwalo kucitwa kumangolezya. Alimwi banji babona kuti kumangolezya nciindi cibotu kapati cakupilukila akutalisya ziiyo zya Bbaibbele.
4. Nkaambo nzi ncociyandika kuba bapampu alimwi babikkila maanu ciindi notutola lubazu mubukambausi bwakumangolezya?
4 Bupampu Bulayandika: Kusala kabotu kulayandika nomutola lubazu mubukambausi bwakumangolezya. Kanji-kanji, ncibotu kuswaya buyo ciindi cakumangolezya kwiinda kuswaya ciindi bali aŋanda nobayanda koona. (Flp. 4:5) Nomukonkomona amulyango naa kupanga hodi, amwiimine mpomukonzya kubonwa alimwi amulipandulule kabotu-kabotu. Cakufwambaana amubaambile kaambo nkomwaswaila. Ikuti naa mwaswaya aciindi citeelede, ambweni ciindi bamumukwasyi nobalya, amubaambile kuti muyoobaswaya ciindi ciboola. Lyoonse kamubikkila maanu.—Mt. 7:12.
5. Mbuti mbotukonzya kulikwabilila kuntenda notuli mubukambausi?
5 Alimwi tweelede kwiibaluka bukkale bubyaabi. Ikuti naa mukambauka ciindi cakulubundu-bundu naa nokwasiya, cilagwasya kweenda mutubunga. Kamweendela mumigwagwa muli mumuni alimwi kutali kulamfwu amaanda. Kamukambaukila buyo mumasena momuyeeya kuti ali kabotu kwasiya.—Tus. 22:3.
6. Ino nzilongezyo nzi zimwi zikonzya kujanwa mubukambausi bwakumazuba alimwi abwakumangolezya?
6 Kukambauka ciindi cakumazuba alimwi akumangolezya kutupa kuti tubeleke mumulimo abapainiya bakugwasyilizya alimwi abapainiya baciindi coonse. (Rom. 1:12) Sena inga mwaucinca mulongo wanu kutegwa mutole lubazu mububambe bwamulimo oobu?