‘Amucite Zyintu Zyoonse Akaambo ka Makani Mabotu’
1. Ino mukambausi wa Bwami ulisungwide kubacitila nzi bantu, alimwi ino nkaambo nzi?
1 Mwaapostolo Paulo wakalimvwa kuti wakajisi mukuli wakukambaukila bantu makani mabotu. (1 Kor. 9:16, 19, 23) Mbubwenya buyo, kubikkila maanu kubukkale bwabantu ibwakumbele kutukulwaizya kuti katusolekesya kubakambaukila makani mabotu.
2. Ciindi notukambauka, ino nkucinca kuli buti nkotulisungwide kucita, alimwi ino nkaambo nzi?
2 Amukambaukile Nkobakonzya Kujanwa Bantu Alimwi Aciindi Ncobajanika: Muntu uucizyi kuzela nswi tabikki lusabwe naa kanyandi kakwe abusena alimwi aciindi ncayanda mwini, pele ukabikka abusena alimwi aciindi ncakonzya kujaya nswi. Andiswe buyo, mbotuli “basikuzuba bantu,” inga twayandika kucinca ciindi ncotukambauka kutegwa katubajana bantu mucilawo cesu, eelyo ciyootupa kuukkomanina kapati mulimo waalubazu ooyu wakujaya “nswi zyamisyobo misyobo.” (Mt. 4:19; 13:47) Tulakonzya kubelesya ciindi cakumazuba kutegwa tucikonzye kubajana bantu mumaanda aabo naa kubelesya ciindi camafwumofwumo kucita bukambausi bwamumugwagwa. Paulo wakajisi makanze ‘aakulungulula Makani Mabotu,’ eelyo wakazibelesya ziindi zyakucita boobo izyakali kujanika.—Inc. 17:17; 20:20, 24.
3, 4. Ciindi notuli mubukambausi, ino muunzila nzi motukonzya kucinca, alimwi ino ncinzi cikonzya kucitika?
3 Amuucince Mubandi Wenu Kweelana Anzyobayandika Bantu Mucilawo: Basikuzela nswi kanji-kanji balacinca-cinca mbobazela kutegwa bajaye musyobo wanswi nzyobayanda. Ino mbuti mbotukonzya kukambauka makani mabotu aa Bwami munzila iipa bantu bamucilawo cesu kuba aluyandisyo? Tweelede kubikkila kapati maanu kujatikizya mbobalimvwa ciindi notwaamba kaambo nkobabikkilide maanu bantu banji mucilawo alimwi tweelede kuswiililisya nzyobaamba kujatikizya kaambo nkotubandika. (Jak. 1:19) Inga twababuzya mbobayeeya kujatikizya kaambo nkotwatalisya. (Tus. 20:5) Mukucita boobu, tuyoocikonzya kuucinca mubandi wesu wamakani mabotu munzila iiyoobajatikizya kapati. ‘Kubantu boonse, Paulo wakaba mbuli mbabo.’ (1 Kor. 9:22) Kucinca-cinca nenzila iigwasya kusika bantu amoyo.
4 Elo kaka cilakkomanisya kukambaukila bantu “makani mabotu loko”! (Is. 52:7) ‘Atucite zyintu zyoonse akaambo ka Makani Mabotu’ kutegwa tukambaukile bantu banji.—1 Kor. 9:23.