Kusikila Bantu Banji Mbuli Mbotukonzya
1. Ncinzi Banakristo bakusaanguna ncobakacita kutegwa basikile ibanji mbuli mbobakali kukonzya amakani mabotu?
1 Basikumutobela Jesu bakusaanguna bakasolekesya ikumwaya mulumbe wa Bwami. Bakabelesya nzila zigwasya kutegwa basikile ibanji amakani mabotu mbuli mbobakali kukonzya. Balembi iba Bbaibbele Banakristo baalemba magwalo aakasololelwa amuuya mu Cigiliki, imwaambo iwakali kubelesyegwa mumasi aakali mu Bulelo bwa Roma. Kuyungizya waawo, bakambausi basungu bamumwaanda wamyaka wabili awatatu C.E. ambweni mbobakali kumbele mukubelesya bbuku litegwa codex, lyatakali kukatazya kubelesya mukujana magwalo kwiinda lya kuvwunga.
2, 3. (a) Mbuti Isaya 60:16 mbwiili mukuzuzikizyigwa mazubaano? (b) Mbuti zibelesyo zisumpukide mbozili mukubelesyegwa kutola ambele bukombi busalala?
2 Kubelesya Zibelesyo Zisumpukide: Kwiinda mumusinsimi Isaya, Jehova wakasinsima kuti: “Uyoonyonka malili aabamasi.” (Is. 60:16) Mukuzuzikizyigwa kwabusinsimi oobu mazubaano, babelesi ba Jehova bali mukubelesya mbono zizwa kumasi ikutola ambele mulimo wakukambauka. Mucikozyanyo, mu 1914, kakuceede myaka iili mbwiibede kuti mabbasikopo atalike kubelesyegwa abasimakwebo, Basikwiiya Bbaibbele bakatalika kutondezya Bbasikopo ya “Photo-Drama of Creation.” Eeyi bbasikopo yamawoola aali lusele iyakajisi zifwanikiso zibotu amajwi, yakapa bumboni bulimvwisya kutuulunzuma twabantu.
3 Mazubaano, bantu ba Leza balabelesya mincini yakusimba iifwambaana kapati alimwi amakkompyuta ikumwaya ma Bbaibbele amabbuku aamba zya Bbaibbele mumyaambo minji. Nzila zifwambaana zyakutola mabbuku aamba zya Bbaibbele zilabelesyegwa ikwaatola kumasena aakule akusikila bantu mumasi aali 235. Kwiinda mumuuya wakwe, Jehova wakulwaizya babelesi bakwe kubelesya zibelesyo eezyi zisumpukide munzila iigwasya, calo capa kuti kasimpe kamu Bbaibbele kajanike kubantu banji kwiinda mbocakabede kaindi.
4. Ino nkucinca kuli buti bamwi nkobacita mubuumi bwabo kutegwa basikile bantu banji amakani mabotu?
4 Kucinca Bukkale: Alimwi bakombi bakasimpe bakulwaizyigwa kucinca bukkale bwabo kutegwa basikile bantu banji amakani mabotu. Ibanji baubya-ubya buumi bwabo kutegwa batole lubazu kapati mumulimo wakukambauka. Ibamwi balongela kubusena ikubulide bakambausi ba Bwami. Bamwi bayungizya mulimo wabo kwiinda mukwiiya mwaambo wakunze aacisi cabo.
5, 6. Ncinzi cikonzya kucitwa kutegwa musikile bantu banji mbuli mbomukonzya mucilawo momubelekela?
5 Kuyungizya waawo, tulakonzya kusikila bantu banji amakani mabotu kwiinda mukukambauka ciindi bantu nobali aŋanda alimwi akooko nkobakonzya kujanwa. Ikuti bantu kabatajaniki aŋanda masikati mucilawo canu, sena inga mwacinca ciindi canu kutegwa mukambauke kumazuba? Sena kuli masena aabuleya nkomukonzya kukambaukila? Sena mwakasoleka kale bukambausi bwaaluwaile akubelekela kumusika? Sena mulacibelesya coolwe ncomujana ikupa bumboni bwamukwiizya?
6 Taciliboteli kaka coolwe ncotujisi cakutola lubazu mukupa bumboni kujatikizya zina lya Jehova a Bwami bwakwe! Atuzumanane kwaambila bantu banji kasimpe kapa buumi ka Jwi lya Leza mbuli mbotukonzya.—Mt. 28:19, 20.