Sena Mulilibambilide Kucinca Kweelana Abukkale?
1. Ino kucinca ikucitika munyika kuyanda kuti katucinca-cinca munzila nzi?
1 Mulugwalo lwa 1 Bakolinto 7:31, Ibbaibbele likozyanisya nyika kubusena bantu nkobacitila zyintu zicinca-cinca lyoonse. Kucinca ikucitika munyika kuyanda kuti ciindi aciindi katucinca-cinca nzila nzyotubelesya mukukambauka, ziindi zyakukambauka, alimwi ambotubasikila bantu. Sena mulilibambilide kucinca kweelana abukkale?
2. Nkaambo nzi ncotweelede kucinca-cinca kweelana abukkale akweendela antoomwe ambunga?
2 Nzila Nzyomubelesya Mukukambauka: Lyoonse mbungano ya Bunakristo ilacinca-cinca kweelana abukkale. Ciindi cakusaanguna Jesu naakatuma basikwiiya bakwe, wakabaambila kuti tiibakeelede kubwezelezya nkomo yazilyo naa mali mumpotomona zyabo. (Mt. 10:9, 10) Nokuba boobo, mukuya kwaciindi wakaacinca malailile aaya akaambo kakuti basikwiiya bakwe bakali kulangila kupenzyegwa alimwi akaambo kakuti mulimo wakukambauka wakatalika kucitwa amuzilawo zimbi. (Lk. 22:36) Mumwaanda wamyaka wainda, mbunga ya Jehova yalikubelesya nzila ziindene-indene—mucikozyanyo, makkaadi aakajisi mulumbe uupa bumboni, sikapepele, alimwi amyootokala yakajisi masipika—kweelana azyakali kuyandika aciindi eeco. Mazuba aano, akaambo kakuti kanji-kanji mumasena manji bantu tabajaniki aŋanda, tukulwaizyigwa kubikkila maano kubukambausi bwakubuleya alimwi abwamukwiizya kutegwa tucikonzye kukambaukila bantu mbotutakonzyi kukambaukila mumulimo wakuŋanda aŋanda. Alimwi tukulwaizyigwa kukambauka kuŋanda aŋanda ciindi cakumangolezya ikuti naa bantu kabali kumilimo ciindi camasyikati. Ciindi nkalaki ya Jehova yakujulu noinyona, sena mulilibambilide kweendela antoomwe anjiyo?—Ezk. 1:20, 21.
3. Ino kucinca kweelana abukkale kutugwasya buti kuzwidilila mucilawo cesu?
3 Mbotubasikila Bantu: Ino nzyintu nzi zibalibilisya bantu bali kubusena nkomukkala? Sena ndipenzi lyakujana mali? Mukwasyi? Nkondo? Cilagwasya kapati kuzyiba mapenzi aaliko mazuba aano alimwi abukkale bujatikizya bantu bali mucilawo cesu kutegwa tucikonzye kulibambila nzila mbotu yakubakambaukila. (1 Ko. 9:20-23) Ciindi bamukamwini ŋanda nobaambaula, ncibotu kapati kubikkila maano kuzyintu zibalibilisya muciindi cakuzumanana amubandi kweelana ambotwakalibambila.
4. Nkaambo nzi ncotuteelede kuwayawaya kucinca kweelana abukkale?
4 Zyintu zyamamanino mubweende bwazyintu oobu ziyoocitika ino-ino, mpoonya mapenzi mapati ayootalika. “Ciindi casyaala caceya.” (1 Ko. 7:29) Eelo kaka cilayandika kapati kucinca kweelana abukkale alimwi akucita oobo kakunyina kuwayawaya kutegwa tucikonzye kubeleka mulimo mupati muciindi cisyoonto cisyeede!