Amucibelesye Kabotu Ciindi Canu
1 Toonse tujisi ciindi ceelene nsondo ansondo, taakwe uujisi ciindi cinji kwiinda mweenzinyina. Iciindi ncotumwaya makani mabotu cilayandika kapati nkaambo tucibelesya mumulimo wakufwutula buumi. (Rom. 1:16) Tulatondezya kuti tulacilemeka ciindi eci kwiinda mukulibambila kabotu mulimo wesu, kutamuka kumiswaangano yamulimo alimwi akufwambaana kwiinka kucilawo ncotukambaukila. Muciindi cakwiide kulindila tweelede kuti katukambauka. Mbwaanga Jehova watuyiisya kuti “zintu zyoonse zilijisi ciindi cazyo,” tweelede kucibelesya kabotu ciindi ncotwabikka aambali camumulimo wakukambauka.—Muk. 3:1.
2 Mutacibelesyi Cabuyamba Ciindi: Ikuti naa twazumanana abubambe butuzumizya kutola lubazu lyoonse mumulimo wamumuunda, tulajana zilongezyo zinji. Ikuzwidilila kwesu mumulimo wamumuunda kuya muciindi ncotubeleka mukukambauka. Sena inga tatukonzyi kutola ciindi cilamfwu mumulimo wamumuunda kuti naa twabucinca bubambe bwesu bwazyakucita asyoonto? Atwaambe, notwamana kucita mulimo wakumwaya mamagazini mu Mujibelo, sena inga tatukonzyi kuyungizya ciindi cakucita nyendo zyakupilukila? Ikuti naa twabeleka ciindi cili mbocibede mumulimo wamumuunda mu Nsondo, sena inga tatukonzyi kutola ciindi cilamfwu kucita nyendo zyakupilukila naa kucitya ziiyo zya Bbaibbele? Sena inga tacikonzeki kuyungizya amulimo wabukambausi bwamumugwagwa notucita bukambausi bwaŋanda-aŋanda? Munzila ezi naa zimbi ambweni inga twautola ambele mulimo wesu.
3 Notuli mumulimo wamumuunda inga twasowa ciindi naa teetwacenjela. Aino nokwapya kapati naa nokuli mvwula, ikulyookezya asyoonto inga kwatukatalusya akutugwasya kuzumanana. Pele mutaciindilizyi pe nkaambo talili lyoonse nokuyandika kulyookezya.
4 Mazubaano caindila kutajana bantu aŋanda. Ikulanganya penzi eli, ibunji bwabasikumwaya balacita mulimo wabo wabukambausi bwamulyango amulyango ciindi cimbi cabuzuba. Ino nomutasoli kukambauka kumazuba kwini-kwini naa kumangolezya?
5 Inga cagwasya kuti tatulyi musalo notucita mulimo wakukambauka wamumugwagwa. Pele abaime alaale amweenzinyina alimwi basikile bantu kutegwa batalisye mibandi ambabo. Munzila eyi ciindi cilabelesegwa kabotu elyo kulajanwa lukkomano mumulimo.
6 Amubelesye Ciindi Cili Coonse Cajanika Kukambauka: Umwi siŋanda naakaamba kuti tayandi kumvwa makani, Kamboni umwi wakabuzya naa kwakali muntu umbi muŋanda ngwaakali kunga wakanana awe. Eci cakapa kuti akanane amwaalumi mwini ŋanda iwakali kuciswa kwamyaka minji elyo kanjikanji wakali kulede buyo. Ibulangizi bwamu Jwi lya Leza bwakamugwasya kubona mpindu yabuumi. Teelyakalampa wakaleka kwiide kulala, wakatalika kwiinka kumiswaangano ku Ŋanda ya Bwami alimwi akukambaukila bamwi zyabulangizi bwakwe bupya!
7 Umwi mwana musimbi wakatobela malailile aakucita mulimo wamumuunda muwoola lyakulindila Ciiyo Cabbuku Cambungano. Naakasika amulyango wakusaanguna, wakaswaangana mwana musimbi wamyaka ili 13 yakuzyalwa walo iwakaswiililisya akubweza bbuku. Ibuzuba bwakatobela, ooyu mucizi mukubusi wakamubona mwana oyu musimbi kucikolo. Teelyakalampa, wakamulomba kuti kabayiya Bbaibbele anguwe, oyu mwana musimbi wakazumina.
8 Ciindi Acibelesegwe Munzila Iigwasya: Ikutola lubazu lyoonse mumulimo wamumuunda citugwasya kuti tucizibe kabotu kumwaya makani mabotu. Sena inga tamukonzyi kuyaambele muluzibo lwanu lwakutalisya mubandi nomukambauka amulyango kwiinda mukubelesya ntalisyo yamakani iibeleka kapati? Sena tamukonzyi kuyaambele muluzibo lwanu lwakuyiisya nomucitya ciiyo ca Bbaibbele caaŋanda? Mwacita boobo, mulacibelesya kabotu ciindi canu nomuli mumulimo alimwi mulazwidilila mumulimo wanu wakukambauka.—1 Tim. 4:16.
9 Mbwaanga “ciindi ncifwiifwi” ciceede, ibukkale bwesu abube bwakucita milimo ya Bunakristo. (1 Kor. 7:29) Akati kazintu nzyotupa ciindi, imulimo wakukambauka weelede kuba wakusaanguna. Atutole lubazu cabusungu mumulimo. Iciindi ndubono lubotu ndwaatupa Jehova. Lyoonse atucibelesye kabotu.
Kabbokesi kali apeeji 4]
Amulange-Lange Malailile Aaya:
◼ Mutanoomuki kusika kumiswaangano yamulimo wakuya mumuunda.
◼ Itukamu twabaabo babelekela antoomwe mubukambausi atube twansaizi.
◼ Mutanoomuki kusika kucilawo ncomukambaukila.
◼ Amubeleke mucilawo aciindi bantu banji nobali mumaanda.
◼ Kamubeleka mulikke zimwi ziindi kuti naa kakutayoosyi.
◼ Amucite nyendo zyakupilukila afwaafwi akucilawo nkomucitila bukambausi bwamulyango amulyango.
◼ Kamuujisi kukambauka ciindi bamwi nobacelesegwa amulyango.
◼ Nokwakonzeka amubeleke ciindi ciinda awoola lyomwe.