Amuzwidilile Mumulimo Wanu

¹ Ijulu lyasiya mbi, mpoona kucecema kuyoosya kuyaabulimvwisya mane waba muzuzumo uusabila. Ikkumbi libaanga mbusi lyaselemuka. Ino ncinzi eci? Nimpi yatuulunzuma twacisozi iyaboola kuzoonyonyweeda limwi anyika! Iciimo eci icipandululwaa musinsimi Joeli cilazuzikizigwa sunu mumulimo wakukambauka uucitwaa balanda ba Leza bananike abeenzinyina, ibankamu mpati.

² Ngazi Yamulindizi yamu May 1, 1998, apeeji 17 muncali 19 yakati: “Impi ya Leza yamazubaano yacisozi yalomya ikupa bumboni ‘mumunzi’ wa Kristendomu. (Joeli 2:9) . . . Bacipola muzisinkilizyo zyoonse, ikunjila mutuulunzuma twaminzi, ikusikila bantu mumugwagwa, ikubandika ambabo kwiinda muluwaile alimwi akubasikila kubelesya nzila zimbi zikonzyeka mbobayaabwaambilizya mulumbe wa Jehova.” Sena tacili coolwe cipati ikutola lubazu mumulimo oyu wakaanzwaa Leza?

³ Mukwiimpana acisozi cini calo cijisi makanze aakulisanina lwaco cini, swebo tobalanda ba Jehova tulalibilika kapati maumi aabaabo mbotukambaukila. Tuyanda kugwasya bamwi ikwiiya kasimpe ikajanwa mu Jwi lya Leza alimwi akubakulwaizya kubweza ntaamu iziyoobasololela kulufwutuko lutamani. (Joh. 17:3; 1 Tim. 4:16) Aboobo, tuyanda kucita mulimo wesu cakuzwidilila. Kufwumbwa naa ninzila nzi njotubelesya kukambauka, tweelede kubona naa tuli mukwiibelesya munzila alimwi aciindi nokunga kwazwidililwa. Mbwaanga “ziyanza zyaansi aano zili muk[ucinca],” inga cabota naa twalingaula nzila zyesu alimwi ambotusikila bantu ikutegwa tusinizye kuti tuli mukuzwidilila mbuli mbokukonzyeka.—1 Kor. 7:31.

⁴ Nokuba kuti tulasoleka kusikila bantu munzila zinji, mulimo waŋanda aŋanda ucili ngomulimo mupati mumulimo wesu. Sena mujana kuti kanjikanji bantu tabajaniki aminzi yabo naa inga baloona ciindi nomubaswaya? Cilatyompya kaka eco, mbwaanga tamukonzyi kubaambila mulumbe wamakani mabotu! Ino buyumuyumu obu inga mwabulwana buti?

⁵ Amunyoneke Alimwi Amubelesye Maanu: Mu Israyeli yamumwaanda wamyaka wakusaanguna, basikuzela nswi bakali kuzela ciindi camasiku. Ino nkaambo nzi ncobakali kuzela masiku? Nokuba kuti eci tiicakali ciindi cibotu kuli mbabo, ncecakali ciindi cibotu cakujaya nswi zinji. Cakali nceciindi cakuzwidilila kapati. Kayaamba zyacilengwa eci, Ngazi Yamulindizi yamu June 15, 1992 yakati: “Aswebo tweelede kucizyiba kabotu cilawo cesu ikutegwa twiinke mukuzela iciindi bantu banji nobali amunzi alimwi nobakonzya kuswiilila.” Ikuti twalangisya bukkale bwabantu tujana kuti mumakkomponi manji alimwi amumasena mukkala bantu banji, ibantu inga balajanika amaanda notuswaya mafwumofwumo mu Mujibelo amu Nsondo, pele ibunji bwabo tabatutambuli kabotu aciindi eco. Ikuti naa mbocibede akooko nkomukkala, sena inga mwacinca ciindi nomuswaya kutegwa mubaswaye aacikasaalizi neciba ciindi cakumazuba? Eeyi nenzila yakuyaambele mumulimo wesu alimwi akutondezya kuti tulababikkila maanu basimukoboma, calo cili ncitondezyo caluyando lwini-lwini lwa Bunakristo.—Mt. 7:12.

⁶ Ku Ba-Filipi 4:5, imwaapostolo Paulo utuyeezya kuti ‘butontozi bwesu bweelede kuzyibwa kubantu boonse.’ Kweelana akaambo aaka kasololedwe aamuuya, tuyanda kuba bantu banyoneka alimwi balibombya munzila zyesu notucita mulimo wesu wakukambauka cabusungu. Kwiina notuyanda ‘kweeleba kuyiisya mukati kabantu awaŋanda aŋanda,’ pele tuyanda kusinizya kuti mulimo wesu waŋanda aŋanda twaucita aciindi ceelede alimwi notukonzya kuzwidilila. (Inc. 20:20) Mbubwena mbuli basikuzela aabo mu Israyeli yamumwaanda wamyaka wakusaanguna, tubikkila maanu ‘kuzela’ aciindi notukonzya kuzwidilila kapati ikutali aciindi cili kabotu kulindiswe pe.

⁷ Ino nkucinca nzi kunga kwacitwa? Kanjikanji, imiswaangano yamumulimo wamumuunda icitwa aciindi ca 9:00 naa 9:30 a.m. mu Mujibelo amu Nsondo, mpoonya ndilyona inkamu ilaunka mumulimo waŋanda aŋanda mucilawo cayo. Pele tubunga twabaalu tumwi twacita bubambe bwakuti inkamu itole lubazu mubukambausi bumbi bwamulimo mbuli bwamumugwagwa, mumasena aamakwebo naa kucita nyendo zyakupilukila, kabatanaunka kuli waŋanda aŋanda muminzi yabantu. Imbungano zimwi, iciindi camuswaangano wamumuunda zyacibikka a 10:00 a.m., 11:00 a.m., naa 12:00 kiloko. Kuzwawaawo inkamu ilaunka mumulimo waŋanda aŋanda akuzumanana mumulimo kusikila kumazuba. Muzilawo zimwi, kumazuba ikutali mafwumofwumo inga caba nceciindi cibotu cakuswaangana kuti kuunkwe mumulimo wamumuunda. Ikucinca kuli boobu kulakonzya kutolaambele mulimo waŋanda aŋanda.

⁸ Amubelesye Bupampu Akucenjela: Notusikila bantu mumulimo waŋanda aŋanda, tujana bantu batambula mulumbe wesu munzila zisiyene-siyene. Bamwi balauteelela, bamwi balaukaka alimwi basyoonto mbaasinkazi naa mbakali. Kujatikizya basinkazi, apeeji 7 mubbuku lya Kukambitsirana za M’malemba, tuyeezyegwa kuti kwiina notuyanda “‘kuzunda mumibandi’ abantu batatondezyi bulemu kukasimpe.” Ikuti naa simunzi mukali, inga cabota kwiile kumusiya buyo. Tatweelede kunyemya bantu kwiinda mukubasinikizya kubandika andiswe naa kubasinikizya kutobela ncotwaamba. Kwiina bantu notubasinikizya kutambula mulumbe wesu. Ikucita boobo takutondezyi butontozi alimwi inga kwaleta mapenzi kuli Bakamboni bambi alimwi akumulimo woonse mbuuzulwa.

⁹ Kamutanatalika kubeleka mucilawo, cilagwasya kulingaula kkaadi yacilawo kuti mubone makkeyala basiminzi nkobakatwaambila kuti tatweelede kuunka. Ikuti makkeyela aali boobo kaaliko, sikumwaya omwe-omwe uubelekela mumudadaada oyo weelede kuzibisyigwa nkwatayelede kuswaya. Kwiina sikumwaya weelede kulisalila kusikila bantu aabo kakunyina kulaililwaa mulangizi wamulimo kuti acite boobo.—Amubone Kabbokesi Kamubuzyo mu Mulimo Wesu Wabwami, wamu January 1994.

¹⁰ Tulakonzya kuzwidilila kwiinda mukubelesya bupampu ciindi notubeleka mumulimo waŋanda aŋanda. Amube bantu balangisisya nomusika aaŋanda yomwe-yomwe. Sena makkatani naa zilibebekezyo zyoonse zilijalidwe? Sena kwiina cimvwika citondezya kuti kuli cili mukucitwa? Eci inga catondezya kuti beni baŋanda baloona. Ambweni tulakonzya kubaa mubandi mubotu amwini ŋanda naa twapilukila ciindi cimbi. Ambweni inga cabota kwiindilila ŋanda eyi calino, pele twiilembe namba yaŋanda eyi. Kamutana kuzwa mucilawo eco mulakonzya kwiinda alimwi aŋanda eyi naa ikulemba amwi kuti muyooswaya alimwi aciindi cimbi.

¹¹ Nokuba boobo kuliziindi notukonzya kubusya muntu cakutazyiba iwoona nokuba kumunyonganya. Ulakonzya kulibonya kucimwa naa kunyema. Ino swebo tweelede kulimvwa buti? Ibbuku lya Tusimpi 17:27 lilaya kuti: “Uutontozya moyo wakwe musongo.” Nokuba kuti tatulilekeleli kujatikizya mulimo wesu, tulakonzya kwaamba kuti twausa akaambo kakuti twaswaya aciindi citeelede. Camoyo mutete tulakonzya kubuzya ciindi cinga caba kabotu mpoonya inga twamusyomezya kuti tulapilukila aciindi eco. Ikutondezya kuti mulamubikkila maanu kapati kwiinda mukukanana mujwi litete kanjikanji kulababombya bantu bali boobo. (Tus. 15:1) Ikuti mukamwini munzi watuzyibya kuti ciindi aciindi ubeleka masiku, tulakonzya kulemba aakkaadi yacilawo ikutegwa ikuswaya kuyootobela kukacitwe aciindi ceelede.

¹² Ibupampu bulayandika anotusoleka kubeleka cakulomya mucilawo cesu. Mbwaanga bantu banji tabajaniki amaanda notuswaya ciindi cakusaanguna, tweelede kusolekesya kubajana kufwumbwa nkobabede kutegwa tubandike mulumbe walufwutuko ambabo. (Rom. 10:13) Imalipooti atondenzya kuti zimwi ziindi basikumwaya balaswaya aaŋanda yomwe njimunya ziindi zili mbozibede buzuba mbubonya kutegwa basole kujana bantu aŋanda eyo. Eci balacibona basimukobonyinaa bantu abo. Aboobo akaambo kaceeci ibantu inga batalika kutongauka kuti Bakamboni ba Jehova ‘lyoonse balaswaya’ mumudadaada oyo. Ino inga cayelebwa buti cilengwa eci?

¹³ Amubelesye bupampu. Nomupilukila nkomwatajanide bantu aŋanda, sena kuli citondezya kuti ono mpobali? Ikuti magwalo alimwi amapepa amwi kaacilibonya kaayunide mukabbokesi kamagwalo, citondezya kuti imuntu oyo tanapiluka pe aboobo ikuyookonkomona aamulyango kwiina ncokunga kwagwasya aciindi eci. Ikuti muntu tanaajanika nomwasoleka muziindi ziindene-indene buzuba obo, mbuli ciindi camangolezya, inga ndiza cakonzyeka kwiile kumutumina buyo luwaile siŋanda oyo. Naa takuli boobo, ikatulakiti naa kapepa kajisi makani aaciiyo kalakonzya kubikkwa kabotu-kabotu kunsi aacitendele ikapati kuti cilawo eco cilabelekwa kanjikanji akumanizyigwa. Alimwi ndiza muntu oyo inga waakujanwa iciindi citobela cilawo eco caakubelekwa.

¹⁴ Tweelede kukweeleba kulansya mibandi aamilyango abasiŋanda aanze nokuunga guwo, nokuwa mvwula naa nokutontola kapati. Nomwaambilwa kunjila muŋanda, mweelede kucenjela kapati kuti mutabikki matombe aacibuye. Amubelesye bupampu iciindi nomukuugwaa mubwa. Nomubelekela mumidadaada iijisi maanda manji, amwaambawide aansi alimwi amukweelebe kuyobeka ikunyonganya basiminzi eyo alimwi ikuzyibya kuti nkomuli mubusena obo.

¹⁵ Amucite Zintu Mubulondo Alimwi Cabulemu: Kwiinda mukweendelezya zintu cabulondo tulakonzya kweeleba kubamba nkamu zipati zikonzya kubukaa kubonwa kuvwuzyanya mucilawo. Basiminzi bamwi balayoowa inkamu mpati yabasikumwaya noibungana kumbele aaŋanda yabo. Tatuyandi pe ikupa muzeezo wakuti tuli ‘mukusaala’ maanda aabantu. Bubambe bwakubelekela mucilawo bulacitwa kabotu lyamuswaangano wamulimo wamumuunda. Tubunga tusyoonto twabasikumwaya, mbuli mukwasyi, kwiina notulibilisya pe kuli basiminzi alimwi tatuyandiki kubambulula pe ciindi cilawo nocibelekwa.

¹⁶ Ikutegwa kube bulondo bazyali beelede kweendelezya kulilemeka kwabana babo kabotu-kabotu nobabelekela mucilawo. Bana beelede kulilemeka kabotu nobali aabapati aamilyango yabantu. Bana basyoonto tabeelede kuzumizyigwa kusobana naa kwiile kweendeenda, calo cipa kuti bantu basikwiinda naa basimunzi banyonganizyigwe akaambo kakulangilila mbabo.

¹⁷ Ikutaciindizya akwalo kulayandika kumakani aajatikizya ciindi cakulyookezya. Mulimo Wesu Wabwami wamu June 1995 apeeji 3 wakati: “Notuli mumulimo wamumuunda, tulakonzya kusowa ciindi ciyandika kapati mukulyookezya ciindi notunywa cibwantu. Nokuba boobo, ikulyookezya kwakaindi kasyoonto kulakonzya kucitwa mwamana kubeleka kwamawoola aali mbwaabede mumulimo. Naa ambweni iciindi nokwawa mvwula naa nokwapya kapati, ikulyookezya kwakaindi kaniini kulakonzya kutukatalusya akutugwasya kuzumanana. Pele banji bayanda kuzumanana kukambaukila bantu muciindi cakuyanzana abakwesu aciindi cakulyookezya pele babelesya ciindi cibikkilidwe mulimo.” Zimwi ziindi ikuluula zyacitika mumulimo wamumuunda mafwumofwumo kulacitwa cakuyobeka aboobo eci cilakonzya kupa kuti mulimo wesu utalemekwi alimwi utazwidilili. Kwiinda mukubelesya bupampu, basikumwaya balakonzya kweeleba kuvwuzyanzya aabusena bomwe alimwi akusowa ciindi citeelede camumulimo.

¹⁸ Ibanji bazwidilila kapati kwiinda mukusikila bantu kufwumbwa nkobajanika—mumigwagwa, musiilwa myootokala alimwi amumasena aamwi aakubuleya. Amwalo mumasena aaya, tuyanda kuzwidililla kukambauka ikutali buyo mukukanana kubotu pele alimwi amubutontozi bwesu. Basikumwaya mumbungano yomwe-yomwe beelede kabiizyi kabotu minyinza yacilawo cabo ikutegwa kabatanyonganyi basikweenda mumasena aamakwebo naa babelesi mumasena aamakwebo, mbuli mumasena munywisigwa mungwimba mwalo imunga mulijaludwe ciindi coonse. Ikutegwa tusinizye kucita mulimo wesu munzila iilondokede, yabulemu, tweelede buyo kubelekela mucilawo cesu ccita kakuli kuli bubambe bugaminide ibwacitwa kwiinda mu Kkomitii Yambungano Yamulimo yambungano imbi, ibwakugwasilizya munzila imwi.—Amweezyanisye 2 Ba-Korinto 10:13-15.

¹⁹ Imbungano zimwi izijisi masena manji imukonzya kucitwa bumboni bwakubuleya, zyaabanyaa-banya masena aaya mutubeela tuniini-niini. Mpoona ikkaadi yacilawo ilapegwa kuli sikumwaya omwe naa inkamu yabasikumwaya. Eci cigwasya kubeleka busena boonse alimwi cikwabilila kuti basikumwaya ibabelekela mubusena bomwe batavwuzyanyi, ikweelana anjiisyo ili ku 1 Ba-Korinto 14:40 yakuti: “Pele zintu zyoonse buyo zicitwe kabotu akucililana.”

²⁰ Lyoonse tweelede kusama cabulemu katulitondezya kuti tuli basimilimo baiminina zina lya Jehova. Mbubwena buyo azibelesyo nzyotubelesya. Izyoola zikulumpele alimwi ama Bbaibbele aakokonyene naa aalaatombe taaupi bulemu pe mulumbe wa Bwami. Caambidwe kuti ikusama alimwi akulibamba kabotu “ninzila iifwambaana yakukanana iipandululwida bantu beengelede naa ndinywe bani, ncomuyanda alimwi amusyobo wabantu nkomweelede kujanika.” Aboobo, insamino yesu tayeelede kuba iitalibonyi kabotu naa yakutalibamba alimwi tayeelede kuba eeyo iiyebeka cakuzwa munzila pele lyoonse yeelede kuba ‘imbotu yeelela Makani Mabotu.’—Flp. 1:27; amweezyanisye 1 Timoteo 2:9, 10.

²¹ Kulugwalo lwa 1 Ba-Korinto 9:26, imwaapostolo Paulo waamba kuti: “Ndazuza boobo, nsizuzi cakulengaana pe. Ndadinka mbubonya, nsiumi muuwo buyo pe.” Mukwiiya Paulo, atukanze kuzwidilila mumulimo wesu. Mbotuzumanana kutola lubazu mumulimo wakukambauka cabusungu katuli “[ba]mpi yacisozi” ya Jehova sunu, atubelesye butontozi bwa Bunakristo abupampu mukutola mulumbe walufwutuko kubantu boonse mucilawo cesu.