Twaambo Tuli 12 Tupa Kuti Katukambauka

Nkaambo nzi ncotukambaukila akuyiisya makani mabotu? Sena kaambo kapati nkakugwasya babombe myoyo kuti beendele munzila iitola kubuumi? (Mt. 7:14) Aaka nkakaambo kakusaanguna mumulongo uuli ansi aawa, pele takali nkakaambo kapati. Nkaakali kaambo akati katwaambo tutobela tuli 12 tupa kuti katukambauka nkomuyeeya kuti nkakaambo kapati?

1. Tugwasya bantu kuti bakafwutuke.—Joh. 17:3.

2. Tucenjezya basizibi.—Ezk. 3:18, 19.

3. Mulimo wakukambauka ulagwasya mukuzuzikizya businsimi bwamu Bbaibbele.—Mt. 24:14.

4. Ncitondezyo cabululami bwa Leza. Kunyina uukonzya kwaamba kuti Jehova tanaakabapa ciindi cakweempwa basizibi katana banyonyoona.—Mil. 17:30, 31; 1 Ti. 2:3, 4.

5. Mulimo wakukambauka utugwasya kuzuzikizya mukuli ngotujisi wakugwasya bantu munzila yakumuuya, aabo balo bakaulwa abulowa bwa Jesu.—Lom. 1:14, 15.

6. Upa kuti tutabi amulandu wabulowa.—Mil. 20:26, 27.

7. Mulimo wakukambauka ulayandika kutegwa andiswe tukafwutuke.—Ezk. 3:19; Lom. 10:9, 10.

8. Utondezya luyando ndotujisi kuli basimukoboma.—Mt. 22:39.

9. Utondezya kuti tulamumvwida Jehova alimwi a Mwanaakwe.—Mt. 28:19, 20.

10. Mulimo wakukambauka ncibeela cabukombi bwesu.—Heb. 13:15.

11. Utondezya kuti tulamuyanda Leza—1 Jo. 5:3.

12. Ulagwasya mukusalazya zyina lya Jehova.—Is. 43:10-12; Mt. 6:9.

Masimpe, ootu tatuli ntotwaambo tulikke tupa kuti katukambauka. Mucikozyanyo, kukambauka kuyumya lusyomo lwesu alimwi akutupa coolwe cilibedelede cakuba babelesinyina a Leza. (1 Ko. 3:9) Pele kaambo kapati ncotukambaukila nkaako kali anamba 12. Kufwumbwa naa bantu balatumvwida naa pe, mulimo wakukambauka ulagwasya mukusalazya zyina lya Leza alimwi akupa Jehova bwiinguzi bwakwiingula yooyo uumusampaula. (Tus. 27:11) Masimpe, tulijisi twaambo tubotu tupa kuti ‘tuzumanane cakutaleka kuyiisya akwaambilizya makani mabotu.’—Mil. 5:42.