Zibalo Zitobelene Izikonzya Kutugwasya Mumulimo Wamumuunda
1. Ino ntwaambo nzi tobilo ncozilembelwa zibalo zijisi mutwe wakuti “Mubandi Amukamwini ŋanda”?
1 Ciindi aciindi, mu Ngazi Yamulindizi yakubuleya mulazwa cibalo cijisi mutwe wakuti, “Mubandi Amukamwini Ŋanda.” Kuli twaambo tobilo ncozilembelwa zibalo eezyi. Kakusaanguna, nkakutugwasya kubandika njiisyo zyamu Bbaibbele munzila iikkomanisya, alimwi kabili nkutondezya mbotukonzya kubandika cabupampu kujatikizya makani amwi aamu Bbaibbele. (1 Pe. 3:15) Mbuti mbotukonzya kuzibelesya kabotu zibalo eezyi?
2. Ino inga twazibelesya buti zibalo eezyi mumulimo wesu wakukambauka?
2 Amuzibelesye Mumulimo: Mulakonzya kuyobola mamagazini amwi aa Ngazi Yamulindizi aajisi zibalo eezyi. Ikuti mukamwini ŋanda, muntu uujisi luyandisisyo, naa sikwiiya Bbaibbele wabuzya mubuzyo naa kutalika kukazya kaambo kamwi ikajanika muzibalo eezyi, amumupe magazini iijisi cibalo eeco akumulomba kuti mucibandike antoomwe. Ikuti kamutajisi magazini iijisi cibalo eeco, mulakonzya kwiikkopa a Web site ya jw.org.
3. Mbuti mbomukonzya kubandika cimwi cazibalo eezyi amukamwini ŋanda?
3 Mbuti mbomukonzya kubandika cimwi cazibalo eezyi amuntu umwi? Bamwi baambila muntu ooyo kuti abale cakupozya majwi aamukamwini ŋanda, mpoonya balo babala majwi aa Kamboni. Kubandika amuntu kwiinda mukubelesya mubandi uusimbidwe cilagwasya nkaambo cipa kuti muntu kaliibide nalingula zyintu nzyotusyoma.—Dt. 32:2.
4. Mbuti mbotukonzya kuliyiisya kwiinda mukubelesya zibalo eezyi zitobelene?
4 Amuliyiisye Nobeni Akuyiisya Bamwi: Ciindi nomubala zibalo eezyi, mweelede kwaalanga-langa magwalo, zikozyanyo, alimwi akuzyiba bupanduluzi buli mukupegwa. Amubikkile maano kuzyiba mbocibandikidwe cibalo eeco. Mpoonya amusole kubelesya nzila eezyi nomuli mumulimo wamumuunda. (Tus. 1:5; 9:9) Mucizyi umwi wakaamba kuti: “Kubala zibalo eezyi cili mbuli kuyiisyigwa amupainiya uucibwene —nkokuti mupainiya uuzyi cakwaamba ciluzi lyoonse!”
5. Mbuti mbotukonzya kubagwasya bantu mbotuyiisya Bbaibbele kulibambila mulimo wamumuunda?
5 Alimwi mulakonzya kubelesya zibalo eezyi kugwasya bantu mbomuyiisya Bbaibbele kulibambila mulimo wamumuunda. Amuzibalile antoomwe zibalo eezyi, akwaambila sikwiiya kuti abale cibeela casikumwaya. Kucita boobu inga cagwasya sikwiiya Bbaibbele kwaamba zyintu nzyasyoma cabupampu. (Kol. 4:6) Masimpe, Jehova ulatugwasya ‘kuzuzikizya’ mulimo wesu cakumaninina kwiinda mukubelesya zibalo eezyi.—2 Ti. 4:5.