Zibalo Zipya Zinoobelesyegwa Kutalisya Ziiyo zya Bbaibbele
1. Ino nzibalo nzi zipya ziyoojanwa mu Ngazi Yamulindizi yakumwaya kubuleya, alimwi zyabambwa buti?
1 Zibalo zipya zinoobelesyegwa kutalisya ziiyo zya Bbaibbele ziyoolibonya kutalikila mu Ngazi Yamulindizi yakwaabila kubuleya ya January-March 2011. Zinoojisi mutwe waamba kuti “Amwiiye Ncolyaamba Jwi lya Leza.” Nokuba kuti bantu bamwi bamucilawo banookkomana kubala zibalo eezyi, pele zyabambilwa kuti kazibandikwa.
2. Ino nzinzi zinoojanika muzibalo eezyi?
2 Zinoojanika Muzibalo Eezyi: Mutwe wamakani amitwe misyoonto yalembwa mbuli mibuzyo yakubuzya beniŋanda mwanoobandika. Magwalo aajisi twaambo tupati-pati aali mucibalo taazubuludwe pe kutegwa beniŋanda babe aaluyandisisyo lwakwiiya kuzwa mu Jwi lya Leza. Mincali mifwaafwi kutegwa ibandikwe mpoonya amulyango. Mutwe umwi aumwi utondezya cibeela cijanika mubbuku lya Bbaibbele Ncoliyiisya kutegwa muzumanane aciiyo mubbuku eeli nokuyandika.
3. Notucita bukambausi bwaŋanda aŋanda, ino inga twabelesya buti zibalo eezyi kutalisya ciiyo ca Bbaibbele amulyango?
3 Mbomukonzya Kuzibelesya: Nomwaabila magazini mulakonzya kubabuzya beniŋanda mubuzyo uukkomanisya uujatikizya cibalo eeco. Mucikozyanyo magazini ya January-March ibandika mboiyandika Bbaibbele. Mulakonzya kubuzya kuti: “Sena Bbaibbele mwiibona kuti ndi Jwi lya Leza naa mbuli buyo bbuku mbotu? [Amulindile bwiinguzi.] Ndijisi cintu cimwi cikkomanisya kujatikizya makani aaya.” Amubatondezye mubuzyo wakusanguna, akubala muncali wamatalikilo, alimwi amubale lugwalo luli mucibalo. Amwiinduluke kubala mubuzyo, mpoonya amulombe mwiniŋanda kwiingula. Amulange-lange twaambo tunji mbuli mbomukonzya, mubelesye mibuzyo iijisi manamba kubandika twaambo. Kamutanaunka amubatondezye mubuzyo uutobela, akupanga bubambe nomuya kupiluka kuti mukabandike mubuzyo ooyo. Amupilukile nsondo ansondo kubandika twaambo tunji tuli mucibalo eeco mane kusikila mukatole magazini iimbi iitobela. Iimwi nzila nkubelesya nzila yacigaminina kutalisya ciiyo ca Bbaibbele kuli beniŋanda. Mpoonya amubelesye cibalo cili mumagazini kutondezya ciiyo ca Bbaibbele mbocicitwa.
4. Ino mbuti mbotukonzya kubelesya zibalo eezi notucita nyendo zyakupilukila?
4 Alimwi mulakonzya kubelesya kabotu zibalo eezyi kuli baabo mbomutolela magazini lyoonse akuli bamwi mbomuswaya munyendo zyakupilukila. Mulakonzya kwaamba buyo kuti: “Kuli cibalo cipya mu Ngazi Yamulindizi. Amuleke ndimutondezye mbocibelesyegwa.” Tupailila kuti zibalo eezyi ziya kugwasya banji kuba “aluzyibo lwini-lwini lwakasimpe.”—1 Tim. 2:4.