Amutobele Cikozyanyo Cabasinsimi—Mika
1. Nkaambo nzi ncotukonzya kuba masimpe kuti bweende bwazyintu bubyaabi buliko lino buyoonyonyoonwa aciindi ncabikkide Jehova?
1 ‘Ino ndilili naayoosika mamanino aabweende bwazyintu oobu butali kabotu?’ Musinsimi Mika ambweni awalo wakayeeya kapati kujatikizya mubuzyo ooyu naakali kwaambilizya mulumbe walubeta lwa Jehova kubwami bwa Israyeli alimwi abwami bwa Juda. Nokuba boobo, lusyomo lwakwe tiilwakali lwabuyo. Mu 740 B.C.E., kacipona Mika, majwi ngaakaamba Jehova kujatikizya Samariya akazuzikizyigwa. (Mik. 1:6, 7) Nikwakainda ciindi, Jerusalemu wakanyonyoonwa mumwaka wa 607 B.C.E. (Mik. 3:12) Mbuti mbotukonzya kumwiiya Mika notulindila lubeta lwa Jehova mazuba aano?
2. Mbuti mbotukonzya kutondezya kukkazyika moyo ciindi notulindila buzuba bwa Jehova alimwi nkaambo nzi?
2 Amukkazyike Moyo: Mika wakalemba kuti: “Mebo njoolangila Jehova, njoolindila Leza walufutuko lwangu. Leza wangu uyoondiswiilila.” (Mik. 7:7) Pele Mika tanaakakkala buyo akulindila kuti mamanino asike. Wakazumanana kubeleka kali musinsimi wa Jehova. Andiswe notulindila buzuba bwa Jehova tweelede kuba ‘abukkale busalala alimwi akubelekela Leza cakulyaaba.’ (2 Pe. 3:11, 12) Kukkazyika moyo kwa Jehova kupa bantu ciindi cakweempwa. (2 Pe. 3:9) Aboobo, tulatobela lulayo lwamu Bbaibbele lwakwiiya kukkazyika moyo kwabasinsimi.—Jak. 5:10.
3. Nkaambo nzi ncotweelede kukombelezya Jehova kuti atupe muuya uusalala?
3 Amusyome Nguzu zya Jehova: Nokuba kuti Mika wakapedwe mulimo uukatazya, wakali kusyoma nguzu nzyapa Jehova kutegwa acite mulimo ngwaakapedwe. (Mik. 3:8) Jehova ulizyi kuti tuyandika nguzu, nkakaambo kaako Jwi lyakwe litukulwaizya kumulomba kuti atupe nguzu. Ulabapa nguzu bantu bakatede kutegwa bazuzikizye milimo yabo yabunaleza. (Int. 84:5, 7; Is. 40:28-31) Sena mwakalibonena kale eeci mumulimo wanu uusetekene? Sena lyoonse mulamukombelezya Jehova kuti amupe muuya wakwe uusalala uulaanguzu?—Lk. 11:13.
4. Ino ncikozyanyo nzi cibotu ncotukonzya kwiiya kuli Mika mazuba aano?
4 Mubuumi bwakwe boonse, Mika wakabikka mulimo wakucita kuyanda kwa Leza mubusena bwakusaanguna. Wakalisinizyide kuzumanana kusyomeka nokuba kuti wakazingulukidwe abantu batakali kulilemeka. Mbubwenya mbuli Mika, lusyomo lwesu lulasunkwa buzuba abuzuba. Aboobo, atuyumye makanze eesu ‘akweenda muzina lya-Jehova Leza wesu lyoonse mane kukabe kutamani.’—Mik. 4:5.