Ino Jehova Undibona Buti?
1. Ino Bbaibbele likozyenye buti acimbonimboni?
1 Sena inga mulalilanga-langa mucimbonimboni? Bunji bwesu tulacita oobo buzuba abuzuba nkaambo cilatugwasya kubona zintu zimwi zijatikizya mbotuboneka nzyotweelede kulanganya. Bbaibbele lyeezyanisyigwa kucimbonimboni. Kubala Jwi lya Leza citugwasya kubona buntu bwesu bwamukati nkokuti eeco Jehova ncabona mulindiswe. (1 Sam. 16:7; Jak. 1:22-24) Ijwi lya Leza, lilakonzya “kuzyiba mizeezo amakanze aamumoyo.” (Heb. 4:12) Mbuti kubala alimwi akuzinzibala kuyeeya nzyotubala mu Bbaibbele abuzuba mbokutugwasya kubona zintu nzyotweelede kucita kutegwa tube bakambausi bazwidilila?—Int. 1:1-3.
2. Mbuti Bbaibbele mbolitugwasya kulilingaula tobeni?
2 Amubelesye Bbaibbele mbuli cimbonimboni: Zibalo zyamu Bbaibbele zyabantu bakali kusyomeka kuli Jehova zilatuyiisya bube ibumukkomanisya. Mucikozyanyo, Davida wakatondezya kuti wakali musungu kujatikizya zina lya Leza. (1 Sam. 17:45, 46) Cabusicamba, Isaya wakalisungula kukambauka mucilawo cikatazya. (Is. 6:8, 9) Akaambo kakuti Jesu wakali kubayanda kapati Bausyi, cakamupa kubona mulimo wakukambauka kuba cintu cikatalusya ikutali cintu ciminya. (Joh. 4:34) Banakristo bamumwaanda wakusaanguna bakakambauka cabusungu, bakasyoma Jehova alimwi bakajisi makanze aakuzumanana kucita oobo. (Mil. 5:41, 42; 2 Ko. 4:1; 2 Ti. 4:17) Kuzinzibala kuyeeya zikozyanyo eezyi, citugwasya kubona mbotukonzya kuyaambele mumulimo wesu wakubelekela Leza.
3. Nkaambo nzi ncotuteelede kusumpya kupanga kucinca kweelede?
3 Amubambulule Aawo Mpomutaciti Kabotu: Masimpe ngakuti, tacikonzyi kutugwasya kulanga mucimbonimboni akutabambulula aawo aatali kabotu. Tulakonzya kumulomba Jehova kuti atugwasye kulilingaula cakusyomeka akubambulula zyeelede kubambululwa. (Int. 139:23, 24; Lk. 11:13) Akaambo kakuti ciindi cacaala caceya alimwi buumi bwabantu bulijatikizyidwe, tatweelede kusumpya kupanga kucinca kweelede.—1 Ko. 7:29; 1 Ti. 4: 16.
4. Ino ncinzi cicitika kumuntu uulangisisya mu Jwi lya Leza mpoonya akubweza ntaamu kujatikizya zintu nzyabala?
4 Buntu bwamukati, bulayandika kapati nkokuti eeco Jehova ncabona mulindiswe kwiinda mbotulibonya. (1 Pe. 3:3, 4) Ino ncinzi cicitika kumuntu uulangisisya mu Jwi lya Leza mpoonya akubweza ntaamu kujatikizya zintu nzyabala? Muntu ooyo ‘uba sikucita mulimo ikutali sikumvwa buyo uuluba, alimwi unookkomene mukuucita.’ (Jak. 1:25) Masimpe, tunookkomene alimwi akuba bakambausi bacibwene akaambo kakuti ‘tutondezya bulemu bwa Jehova mbuli zimbonimboni.’—2 Ko. 3:18.