Amucibelesye Kabotu Cimbonimboni

Sikwiiya Jakobo wakakozyanisya Bbaibbele kucimbonimboni calo icitugwasya kuzyiba buntu bwesu bwamukati. (Jak. 1:​22-25) Aboobo, mbuti mbotukonzya kulibelesya kabotu mbubwenya mbuli cimbonimboni?

Amubale cakulomya. Ikuti naa twaile kulilanga buyo cakubinda mucimbonimboni, inga tiitwabona kuti kuli cilubide kujatikizya mbotulibonya. Ikutegwa tubone mumbazu muyandika kubambulula kujatikizya buntu bwesu bwamukati, tweelede kubala Jwi lya Leza cakulomya.

Amubikkile maano kubona momuyandika kubambulula nywebo ikutali bamwi. Ikuti cimbonimboni cabbendekwa, cilakonzya kutondezya muntu uumbi calo cikonzya kupa kuti tubikkile maano aawo mpatalibonyi kabotu. Mbubwenya buyo, tulakonzya kubala Bbaibbele akutalika kuyeeya bantu bambi mobayandika kubambulula. Pele eeci inga tiicatugwasya kubambulula kulezya kwesu.

Amuzilange kabotu zintu. Ikuti twabikkila maano kapati kujatikizya waawo mpotutalibonyi kabotu ciindi notulilanga mucimbonimboni, tulakonzya kutyompwa. Mbubwenya buyo, tweelede kuba bantu bazilanga kabotu zintu ciindi notubala Jwi lya Leza kwiinda mukutalangila kucita zintu nzyotutakonzyi kwiinda zeezyo Jehova nzyalangila.—Int. 103:14.