Amubelesye “Makani Aajanika mu Jwi lya Leza”—Kutalisya Mubandi
1. Ino ncibelesyo nzi cipya ncotujisi cakubelesya mumulimo wakukambauka?
1 Ibbaibbele lya Busanduluzi Bwanyika Mpya lilijisi cibeela kumatalikilo icijisi mutwe wakuti “Makani Aajanika mu Jwi lya Leza.” Mumyaambo imwi, cibeela eeci cili mukabbuku. Ino inga twacibelesya buti cibelesyo eeci cipya ciindi notulibambila mbotukonzya kutalisya mibandi mumulimo wakukambauka? Mbwaanga cibeela eeci cijisi magwalo aabandika twaambo twamu Bbaibbele twiindene-indene mbubwenya mbuli bbuku lya Reasoning, cibeela eeci cilakonzya kugwasya kapati kutalisya mibandi.
2. Ino mbuti mbotukonzya kucibelesya cibeela cakuti “Makani Aajanika mu Jwi lya Leza” mumulimo?
2 Mulakonzya kubelesya mubuzyo wanamba 8 akwaamba kuti: “Tuyabuswaya basimukoboma kwakaindi kasyoonto nkaambo bantu banji balalibuzya kuti, ‘Sena Leza nguupa kuti bantu kabapenga?’ [Muzilawo zimwi, cilagwasya kapati kumutondezya mubuzyo mukamwini ŋanda.] Ino nywebo muyeeya buti? [Amulindile bwiinguzi.] Ibbaibbele lilapa bwiinguzi bumvwika kumubuzyo ooyu.” Amubale akubandika kapango komwe naa tuli mbotubede mwini mu Bbaibbele. Ikuti naa mukamwini ŋanda watondezya luyandisisyo, mulakonzya kumutondezya mibuzyo iili 20 akumulomba kuti asale omwe ngomuyoobandika mwaakuswaya alimwi. Naa ambweni mulakonzya kumwaabila bbuku lyesu limwi lyakwiiya lijisi makani manji kujatikizya kaambo nkomwali kubandika.
3. Ino inga twacibelesya buti cibeela cakuti “Makani Aajanika mu Jwi lya Leza” kutalisya mibandi muzilawo muli bantu bazulilwa kuzikombelo zitali zya Bunakristo?
3 Mubuzyo wanamba 4 alimwi a 13 kusikila ku 17 ilakonzya kugwasya kapati ciindi nomukambaukila muzilawo muli bantu bazulilwa kuzikombelo zitali zya Bunakristo. Mucikozyanyo, mulakonzya kubelesya twaambo tuli mumubuzyo namba 17 akwaamba kuti: “Tuyabuswaya mikwasyi kwakaindi kasyoonto. Sena tamuzumini kuti mikwasyi minji ilijisi mapenzi manji mazuba aano? [Amulindile bwiinguzi.] Banabukwetene banji bajana kuti majwi aaya aabusongo alagwasya kapati: ‘Mukaintu weelede kumulemeka kapati mulumaakwe.’ [Tamuyandiki kuti mane mwaambe kuti majwi aaya azwa mulugwalo lwa Baefeso 5:33. Ikuti naa mubandika aamukaintu, mulakonzya kwaamba majwi aali mulugwalo lwa Baefeso 5:28.] Sena kubelesya lulayo oolu mucikwati inga cagwasya?”
4. Ino ncinzi ncomukonzya kucita kumamanino aamubandi ngomwajisi amuntu uuzulilwa kucikombelo citali ca Bunakristo?
4 Kumamanino aamubandi wanu, amupangane kuti mukazumanane amubandi ciindi ciboola. Ambweni mulakonzya kupangana kuti mukabandike lugwalo alumbi ansi aamubuzyo ngomwali kubandika. Aciindi ceelede, amumwaambile mukamwini ŋanda kuti makani aaya aagwasya ngomwali kubandika anguwe azwa mu Bbaibbele. Kweelana amibandi njomwali kubandika musyule alimwi ambwalibona Bbaibbele muntu ooyo, amumwaabile bbuku ndyomuyeeya kuti inga lyamukkomanisya.—Amubone pepa lyamukati lya Mulimo Wesu wa Bwami wamu December 2013.