Mbomukonzya Kuzibelesya Zyakuswiilila Zyakalekkoodwa
1. Kuyungizya amabbuku aalembedwe, ino ncibelesyo nzi acimbi ncotujisi?
1 Bantu banji balakkomana kubelesya webbusaiti ya jw.org ikubala majwi aakkomanisya alimwi aaluzi aakasimpe. (Muk. 12:10) Pele sena mwakazibelesya kale zyakuswiilila zyakalekkoodwa? Eezyi zipa kuti cikonzyeke kuswiilila makani manji aali a webbusaiti yesu. Ino zyakuswiilila zyakalekkoodwa inga zyatugwasya buti?
2. Mbuti mbotukonzya kuzibelesya zyakuswiilila zyakalekkoodwa notucita ciiyo cesu tobeni naa notukomba mumukwasyi?
2 Notucita Ciiyo Cesu Tobeni Alimwi Aciiyo Camukwasyi: Kuswiilila zyakalekkoodwa zyamu Bbaibbele, mumamagazini, naa mumabbuku ciindi notuli mulweendo naa notubeleka milimo yesu yabuzuba abuzuba kulakonzya kutugwasya kucibelesya kabotu ciindi cesu. (Ef. 5:15, 16) Eeyi ninzila aimwi yakukomba mumukwasyi, kuswiilila kubalwa kwacibalo cimwi kumwi katutobelezya mumabbuku eesu. Kuswiilila zyakalekkoodwa ciindi notucita ciiyo cesu tobeni kulagwasya kapati kwaambisya kuti katuyanda kuyaambele mukubala kwesu naa kwiiya mwaambo umwi.
3. Ino mbaani bakonzya kugwasyigwa mucilawo cesu azyakuswiilila zyakalekkoodwa?
3 Notukambauka: Bantu bali mucilawo cesu ibalimvwa kuti bajisi bubi cakuti tabajisi ciindi cakubala, balakonzya kuzumina kuswiilila zyakalekkoodwa kale. Ambweni tulakonzya kuyaanya baabo ibaambaula mwaambo umbi alimwi ibalibambilide kuutambula mulumbe wa Bwami ‘mumwaambo ngobakazyalwa anguwo.’ (Mil. 2:6-8) Mumasena aamwi, kuswiilila ncilengwa buya ciyandika kapati. Mucikozyanyo, bantu baitwa kuti Hmong bajisi cilengwa cakwaamba makani aakaindi kubana babo kwiinda mukubaambila mulomo mpande, alimwi bacita kabotu kapati nkaambo tabalubi makani ngobamvwa. Bantu banji bamu Afrika cilabakkomanisya kapati kwiiya zintu kwiinda mutwaano.
4. Mibuzyo nzi njotukonzya kulibuzya kutegwa tugwasye bantu bali mucilawo cesu?
4 Mucilawo canu, sena inga cagwasya kulizya zibeela zimwi zyakuswiilila zyakalekkoodwa mumwaambo wamukamwini ŋanda? Sena kuli bakonzya kugwasyigwa abbuku lyakuswiilila lyakalekkoodwa kuti twabatumina a e-mail? Sena inga cagwasya kukkopa a CD ibbuku lyakuswiilila lyakalekkoodwa akulipa kuli mukamwini ŋanda iwakatondezya luyandisisyo, ambweni kwiinda mukumupa abbuku lisimbidwe? Kufwumbwa bbuku likkwene lyakuswiilila lyakalekkoodwa, broshuwa, naa tulakiti ndyotukonzya kupa muntu mubukambausi lilakonzya kulipootwa antoomwe amabbuku ngotwamwaya. Zyakuswiilila zyakalekkoodwa zyakabambilwa kuti kazitugwasya notucita ciiyo cesu tobeni alimwi akusyanga mbuto zyakasimpe ka Bwami.—1 Kor. 3:6.