Sena Mulaakuswiilila ku Bbaibbele Lyamu Cikuwa Lyakalekkoodwa?

Ino Bbaibbele lyakalekkoodwa ndiili? Eeli ndi Bbaibbele lyakalembululwa lya New World Translation. Lilimukumwaigwa asyoonto-syoonto mumyaambo minji. Cintu cimwi cibotu kujatikizya Bbaibbele eeli ncakuti kwakabelesyegwa majwi aabakwesu abacizyi baindene-indene kulekkooda majwi aaindene aabantu bamu Bbaibbele. Mabala akakankaizyigwa bweelede kutegwa mulumbe wamu Bbaibbele waambwe munzila iiluzi.

Ino mbuti bamwi mbobali mukugwasyigwa a Bbaibbele eeli? Ibanji baswiilila kukubalwa kwamu Bbaibbele eeli, cilabagwasya kweezyeezya zintu zyakali kucitika muzibalo izili mukubalwa alimwi akumvwisya cilembedwe. (Tus. 4:5) Kumane banji abalo bajana kuti kuswiilila ku Bbaibbele eeli kulabatontozya nobalibilikide.—Int. 94:19.

Kuswiilila nolibalwa Jwi lya Leza kulakonzya kubujatikizya kapati buumi bwesu. (2Mak. 34:19-21) Ikuti Bbaibbele lyakalekkoodwa kaliliko lyoonse naa cibeela buyo mumwaambo ngomumvwa, amulibikkile pulogilamu yakuliswiilila lyoonse akwiipanga kuba cibeela cabuumi bwanu.

AMWEEBELELE KAVIDIYO KAKUTI MBOLILIMUKUPANGWA BBAIBBELE LYAKALEKKOODWA—KABEELA BUYO, MPOONYA MWIINGULE MUBUZYO UUTOBELA:

Ncinzi camukkomanisya kujatikizya mbolipangwa Bbaibbele lyakalekkoodwa?