Tulaiya Kujatikizya Leza Kwiinda Mubasinsimi Bakwe

Kaindi, Leza wakali kupa basinsimi bakwe mulumbe uuyandika kapati ngobakeelede kwaambila bantu. Sena milumbe eeyo ilakonzya kututondezya mbotukonzya kutambula zilongezyo zya Leza? Inzya, ilakonzya. Atubone ncotukonzya kwiiya kubasinsimi basyomeka botatwe.

ABRAHAMU

Leza tasalululi alimwi uyanda kubalongezya bantu boonse.

Leza wakasyomezya musinsimi Abrahamu kuti “mikwasyi yoonse yaanyika iyoolongezyegwa kwiinda mulinduwe.”—Matalikilo 12:3.

Ino ncinzi ncotwiiya? Leza ulatuyanda kapati alimwi uyanda kwiilongezya mikwasyi yoonse, nkokuti bamaalumi, bamakaintu alimwi abana ibamumvwida.

MUSA

Leza ngusiluse alimwi ulabalongezya aabo ibabeleka canguzu kutegwa bamuzyibe.

Singuzuzyoonse wakapa musinsimi Musa nguzu zyakucita maleele. Pele Musa wakapaila kuti: “Kondizyibya nzila zyako, kutegwa ndikuzyibe akuzumanana kufwidwa luzyalo mumeso aako.” (Kulonga 33:13) Leza wakakukkomanina kulomba kwa Musa alimwi wakamulongezya kwiinda mukumupa luzyibo lunji akumvwisya nzila zyakwe abube bwakwe. Mucikozyanyo, Musa wakaiya kuti Mulengi ngu “Leza siluse alimwi silweetelelo.”—Kulonga 34:6, 7.

Ino ncinzi ncotwiiya? Leza uyanda kutulongezya toonse, nkokuti bamaalumi, bamakaintu alimwi abana, ikuti naa twasolekesya kumuzyiba kabotu. Mu Jwi lyakwe, ulatwaambila mbotweelede kumukomba, mbwalimvwa kujatikizya ndiswe alimwi ambwatweendelezya.

JESU

Tulakonzya kuba azilongezyo zya Leza zitamani ikuti naa twaiya kujatikizya Jesu, zintu nzyaakacita alimwi anzyaakayiisya.

Jwi lya Leza lijisi makani manji aajatikizya buumi bwa Jesu alimwi anzyaakayiisya. Leza wakapa Jesu nguzu zyakucita maleele manji mbuli kuponya boofwu, basinkematwi alimwi abalema. Alimwi wakababusya aabo bakafwide. Aboobo Jesu wakatondezya zilongezyo Leza nzyayoocitila bantu boonse kumbele. Wakapandulula umwi aumwi wesu mbwakonzya kuzijana zilongezyo eezyo naakati: “Eeci caamba buumi butamani, ikuti bakuzyiba yebo O Leza mwini-mwini ooli olikke, ayooyo ngookatuma, Jesu Kristo.”—Johane 17:3.

Jesu wakali silweetelelo, silubomba alimwi siluzyalo. Bamaalumi, bamakaintu, bana alimwi abapati, bakali kuunka kulinguwe, ikuzumina kutamba kwakwe kwakuti: ‘Amwiiye kulindime, nkaambo ndili mubombe moyo, alimwi ndilalicesya, eelyo mulakatalusyigwa.’ (Matayo 11:29) Mukwiimpana abantu bakuciindi cakwe ibatakali kubeendelezya kabotu bamakaintu, Jesu wakali kubeendelezya caluzyalo bamakaintu alimwi acabulemu.

Ino ncinzi ncotwiiya? Jesu wakali kubayanda kapati bantu, alimwi wakatusiila cikozyanyo cibotu kapati cambotweelede kweendelezyanya.

JESU TALI LEZA PE

Jwi lya Leza liyiisya kuti “kulindiswe kuli buyo Leza omwe” alimwi akuti Jesu Kristo wakali mwaambilizi wa Leza uulicesya. (1 Bakorinto 8:6) Jesu wakaamba caantangalala kuti Leza mupati kwiinda nguwe alimwi akuti Leza ngowakamutuma anyika.—Johane 11:41, 42; 14:28.a

a Kutegwa mwiiye zinji kujatikizya Jesu Kristo, amubone cibalo 4 alimwi a 5 cabbuku lyakuti Ncinzi Bbaibbele Ncolituyiisya? alimwi nkolili a www.jw.org.