Mulengi Wesu Siluyando Ulatubikkila Maano
1. MULENGI WESU ULAPASUZYA ZUBA
Ino muyeeya kuti buumi nobwali buti anyika ikuti nokwanyina zuba? Izuba ndelipa kuti zisamu zibe amatuvwu, maluba-luba, micelo alimwi anseke. Alimwi lilapa kuti zisamu kazikwela maanzi kuzwa mubulongo kwiinda mukubelesya miyanda akuunka kumatuvwu mpoonya amumuwo.
2. MULENGI WESU ULAPA MVWULA
Leza watupa mvwula yalo iipa kuti anyika kakumena zyakulya nzyotulya. Leza ulatupa mvwula kuzwa kujulu aziindi eelyo nokuba micelo minji, alimwi ulatukkutya azilyo akuzuzya myoyo yesu akubotelwa.
3. MULENGI WESU ULATUPA ZYAKULYA AZYAKUSAMA
Bazyali banji balalibilika kujatikizya mbobakonzya kujanina mikwasyi yabo zyakulya alimwi azyakusama. Pele amubone ncaamba Magwalo: “Amulangisye bayuni bauluka mujulu; tabasyangi mbuto naa kutebula nokuba kuyobola mumatala, nokuba boobo Uso wakujulu ulabasanina. Sena tamuyandiki kwiinda mbabo?”—Matayo 6:25, 26.
“Amwiiye kumaluba-luba aamusyokwe mbwaakomena . . . ; pele ndimwaambila kuti naba [Mwami] Solomoni mubulemu bwakwe boonse kunyina naakasamide mbuli limwi lyayaaya. Lino ikuti naa Leza mbwazisamika oobu zimena musyokwe . . . , sena takaindi kumusamika nywebo?”—Matayo 6:28-30.
Mbwaanga Leza ulakonzya kutupa zyakulya alimwi azyakusama, tacidoonekwi kuti ulakonzya kutugwasya kujana zintu azimbi nzyotuyandika mubuumi. Kuti katubikkila maano kucita kuyanda kwa Leza, ulakonzya kulongezya kusolekesya kwesu kwiinda mukupa kuti tutebule zyakulya zinji naa kutugwasya kujana mulimo kutegwa katuula zintu nzyotuyandika.—Matayo 6:32, 33.
Masimpe, tulijisi twaambo tubotu itutupa kumuyanda Leza ciindi notulanga zuba, mvwula, tuyuni alimwi amaluba-luba. Cibalo citobela cilabandika kujatikizya Mulengi wesu mbwaali kubandika abantu.