Ncinzi Ncomukonzya Kwiiya ku Nyimbo Zimbi?

Ino ninyimbo nzi zimbi nzyomuyandisya kapati? Nkaambo nzi ncomuziyandisya? Sena muyeeya kuti mavidiyo aanyimbo eezyi atondezya zintu zicitika mubuumi bwabuzuba abuzuba? Akaambo kamitwe yiindene-indene yanyimbo eezyi alimwi amboziimbwa, tulakonzya kwaamba kuti muntu uuli woonse kuli nyimbo iimujatikizya. Nokuba boobo, nyimbo zimbi alimwi amavidiyo aanyimbo tiizyakabambilwa kuti kazitukkomanisya buyo.

Lwiimbo lumwi alumwi lulijisi njiisyo zigwasya nzyotukonzya kubelesya mubuumi bwesu bwa Bunakristo alimwi amumulimo wamumuunda. Nyimbo zimwi zyaamba kapati kujatikizya kusamausya beenzu, lukamantano, zilongwe, busicamba, luyando naa lusyomo. Zimwi zyaamba kujatikizya kupilukila kuli Jehova, kulekelela, kuzumanana kusyomeka alimwi akuba ambaakani zyakumuuya. Alimwi buya kuli lwiimbo lumbi ilwaamba kujatikizya kwaabelesya kabotu mafooni. Ino nziiyo nzi zimbi zigwasya nzyomwaiya munyimbo zimbi?

AMWEEBELELE KAVIDIYO KALWIIMBO LUMBI LWAKUTI NYIKA MPYA ILAAFWAAFWI, MPOONYA MWIINGULE MIBUZYO IITOBELA:

• Ino nzilongezyo nzi zyakumbele nzyobayeeya banabukwetene bacembeede?—Matl. 12:3

• Mbuti mbotukonzya kuyumya lusyomo lwesu lwakuti Jehova ulakonzya kuzizuzikizya zisyomezyo zyakwe?

• Ino nkubonana kuli buti kukkomanisya ikuyoocitika ino-ino?

• Ino zilongezyo zya Bwami zitugwasya buti kuliyumya kumapenzi ngotujana lino?—Rom. 8:25