Ncinzi Cini Cikonzya Kumupa Kuzyiba Buumi Bwanu Mbobunoobede Kumbele?
Bantu banji basyoma kuti kuli nguzu zitalibonyi izyeendelezya buumi bwabo bwakumbele. Akaambo kakusyoma boobu, cibapa kutobela zilengwa zimwi nzyobayeeya kuti zilakonzya kupa kuti buumi bwabo bukabote kumbele.
NZYOBASYOMA BANTU BANJI
KUPANDULULA BWEENDE BWANYENYEEZI: Bantu bamwi basyoma kuti buumi bwabo bwakumbele, buyeeme ambozyakabede nyenyeezi ciindi nobakazyalwa. Aboobo, balabuzya kuli basikupandulula bweende bwanyenyeezi naa ma horoscope, kutegwa bazyibe buumi bwabo mbobunoobede kumbele, mpoonya akubweza ntaamu kutegwa beelebe zintu zibyaabi zilangilwa kuyoobacitikila naa kucita zintu zikonzya kubapa kuzwidilila.
BASIKWAAMBA ZYAKUMBELE: Bamwi basyoma kuti ikubuzya basikwaamba zyakumbele, cilakonzya kubagwasya kuzyiba kaambo ncozibacitikila zintu zimwi alimwi ancobeelede kucita. Aboobo kufwumbwa buyo bazyiba kaambo, nkokuti balakonzya kulikwabilila kuntenda zikonzya kubacitikila, kujana nzila yakumana mapenzi aabo alimwi akuzwidilila mubuumi.
KUKOMBA BASIKALE: Bantu bamwi basyoma kuti beelede kukkomanisya basikale bafwide naa baleza baindene-indene kutegwa bakwabililwe alimwi akulongezyegwa. Ba Vana ibakkala ku Vietnam bakaamba kuti: “Ndisyoma kuti kwiinda mukukomba basikale, ndilakonzya kuba abuumi bubotu lino alimwi akuyooba abuumi bubotu kumbele antoomwe abana bangu.”
KUZYALULULWA: Bantu banji basyoma kuti ciindi muntu afwa, ulazyalululwa, alimwi akuti eeci cilacitika cakwiinduluka-induluka. Basyoma kuti zintu zibotu naa zibi izibacitikila lino, zilacitika akaambo kazintu nzyobakacita mubuumi bwabo bwamusyule.
Nokuba boobo, banji babona njiisyo eezyi kuti nkusyoma mizimo. Pele nokuba kuti baamba kuti mbobazibona oobo, bacicita zilengwa mbuli kulanga tweengo twamumaanza, ma horoscope, nsengo, meja, nkakata alimwi acimbonimboni. Basyoma kuti ambweni zintu eezyi zilakonzya kubagwasya kuzyiba mbobunoobede buumi bwabo bwakumbele.
SENA ZILENGWA EEZYI ZILAGWASYA?
Sena aabo ibasyoma zintu eezyi alimwi akuzicita bajisi buumi bubotu lino alimwi akuyooba abuumi bubotu kumbele?
Amubone cikozyanyo caba Hào, ibakkala ku Vietnam. Bakali kuunka kuli basikupandulula bweende bwanyenyeezi, basikwaamba zyakumbele alimwi akukomba basikale kutegwa babape busolozi. Sena bakazwidilila? Ba Hào bakaamba kuti: “Ndakasweekelwa mali manji, ndakanjila muzikwelete, ndakatalika kuzwangana abanamukwasyi alimwi akutyompwa kapati.”
Ba Qiuming, ibakkala ku Taiwan, abalo bakali kusyoma basikupandulula bweende bwanyenyeezi, kuzyalululwa, kucitikilwa zintu zyakabambilwa limwi kuti ziyoocitika, basikwaamba zyakumbele, alimwi akukomba basikale. Nobakamana kulanga-langa njiisyo eezyi cakusitikila, bakaamba kuti: “Ndakabona kuti njiisyo zili boobu antoomwe azilengwa zilakazyanya alimwi buya zilanyonganya. Ndakajana kuti nzyobaamba basikupandulula bweende bwanyenyeezi kanji-kanji tiizyakali zyamasimpe. Caboola kukuzyalululwa, ikuti naa kotabuyeeyi buumi bwako bwamusyule, ino mbuti mbokonzya kucinca akucita zintu zibotu mubuumi butobela?”
“Ndakabona kuti njiisyo zili boobu antoomwe azilengwa zilakazyanya alimwi buya zilanyonganya.”—MBOBAKAAMBA BA QIUMING, BAKU TAIWAN
Kweelana ambobakaamba ba Hào, ba Qiuming alimwi abamwi, buumi bwakumbele tabukonzyi kuzyibwa kwiinda muzintu zyakabambilwa limwi kuti ziyoocitika, kulanga nyenyeezi, kusyoma basikale bakafwa naa kuzyalululwa. Sena eeci caamba kuti tatukonzyi kubweendelezya buumi bwesu bwakumbele?
Bantu banji basyoma kuti nzila iikonzya kuyoobapa kuba abuumi bubotu kumbele nkuba alwiiyo lwaatala alimwi alubono lunji. Ino ncinzi cabacitikila bamwi akaambo kakusala boobu?
a Mucibalo eeci alimwi azitobela, mazina aamwi acincwa.
b Majwi aaya alajanika mu Bbaibbele kulugwalo lwa Bagalatiya 6:7. Alimwi aleendelana akaambyo kazyibidwe kapati kakuti, Ncosyanga, ncotebula.