Ciindi Kusulaika Bamwi Nokuyoomanina Limwi!
Nokuba kuti swebo twaleka kusulaika bamwi, tatukonzyi kupa kuti bantu boonse baleke kusulaika bamwi. Bantu banyina mulandu bazumanana kusulaikwa. Ino nguni uukonzya kumana lusulo mane kukabe kutamani?
Jehova Leza alikke nguukonzya kumana penzi lyakusulaikana cakumaninina lyalo ndyotubona munyika mazuba aano. Eeci ncencico ncayoocita kweelana ambolisyomezya Bbaibbele.—Tusimpi 20:22.
LEZA UYOOZIGWISYA ZINTU IZIPA KUTI KAKULI LUSULO
1. SAATANI DIABOLOSI. Saatani, imungelo muzangi, nguupa kuti kakuli kusulaikana nkotubona mazuba aano. Leza uyoomunyonyoona Saatani antoomwe abaabo basulaika bamwi mbuli nguwe.—Intembauzyo 37:38; Baroma 16:20.
2. NYIKA YA SAATANI MBYAABI. Leza uyoozigwisya zintu zyoonse zikulwaizya lusulo, kubikkilizya abasimapolitikisi alimwi abasololi bazikombelo ibakulwaizya lusulo. Alimwi Leza uyoobanyonyoona basimakwebo balyato, bampelenge alimwi ibalida bamwi masuku amutwe.—2 Petro 3:13.
3. KUTALONDOKA KWABANTU. Bbaibbele lyaamba kuti bantu boonse bakakona kutalondoka, nkokuti cilengwa cakuyanda kucita zintu zibyaabi. (Baroma 5:12) Kusulaika bamwi ncimwi cazilengwa eezyo izyakutalondoka. Leza uyootugwasya kuleka zilengwa zyoonse izyakutalondoka zibyaabi, mpoonya lusulo talukabi limbi.—Isaya 54:13.
BBAIBBELE LISYOMEZYA NYIKA IMUNOONYINA KUSULAIKANA
1. KUNOONYINA KUTALULAMA. Bwami bwa Leza buyakweendelezya nyika yoonse. Buyakweendelezya kuzwa kujulu alimwi buyooleta bululami mane kukabe kutamani. (Daniele 2:44) Alimwi kunoonyina lusalululo. Leza uyookumana kutalulama koonse kubacitikila bantu mazuba aano.—Luka 18:7.
2. BANTU BOONSE BANOOKKALA CALUUMUNO. Kunyina muntu uuyoopenga akaambo kankondo. (Intembauzyo 46:9) Bantu boonse ibanookkala anyika banooli basiluumuno, aboobo nyika bunooli busena bubotu bwakukkala.—Intembauzyo 72:7.
3. BANTU BOONSE BAYOOPONA KUKABE KUTAMANI MUBUKKALE BUBOTU KAPATI. Bantu boonse ibanookkala munyika, banoojisi luyando lwini-lwini kuli basimukobonyina. (Matayo 22:39) Kunyina muntu uuyoopenga akaambo kamizeezo iitali kabotu naa kuyeeya zintu zibyaabi izyakamucitikila kaindi. (Isaya 65:17) Ciindi lusulo lwaakumana, bantu “bayoobotelwa kapati muluumuno lunji.”—Intembauzyo 37:11.
Sena inga mwayanda kuyoopona munyika iili boobu? Noliba lino, bantu banji baiya mbobakonzya kuleka kusulaika bamwi kwiinda mukutobela njiisyo zyamu Bbaibbele. (Intembauzyo 37:8) Eeci ncencico Bakamboni ba Jehova nyika yoonse ncobali mukucita. Nokuba kuti bazwa mubukkale bwiindene-indene alimwi batobela zilengwa ziindene-indene, balikamantene alimwi balayandana.—Isaya 2:2-4.
Bakamboni ba Jehova bayookkomana kumwaambila nzyobakaiya kujatikizya mbomukonzya kuliyumya kupenzi lyakutalulama alimwi akusalululana. Nzyomuyakwiiya ziyoomugwasya kuleka kusulaika bamwi akutalika kubayanda. Mulakonzya kwiiya mbomukonzya kutondezya luyando kubantu boonse, nobaba baabo ibasulaika bamwi. Akaambo kaceeci, mulakonzya kukkomana noliba lino alimwi cilongwe canu abamwi ciyoobota. Kwiinda zyoonse, muyakwiiya ncomukonzya kucita kutegwa mukapone mubweendelezi bwa Bwami bwa Leza ciindi lusulo noluyomanina limwi.—Intembauzyo 37:29.