MBOTUKONZYA KUMANA PENZI LYAKUSULAIKANA

4 | Amuleke Lusulo Kwiinda Mukugwasyigwa A Leza

Njiisyo Yamu Bbaibbele:

“Mucelo wamuuya ngooyu: luyando, lukkomano, luumuno, kukkazika moyo, luzyalo, bubotu, lusyomo, kubomba moyo, kulilesya.”—BAGALATIYA 5:22, 23.

Ncocaamba:

Cilakonzyeka kumana penzi lyalusulo kwiinda mukugwasyigwa a Leza. Muuya wakwe uusalala ulakonzya kutugwasya kuba abube mbotutakonzyi kuba ambubo munguzu zyesu tobeni. Aboobo, muciindi cakusola kuzunda penzi lyalusulo munguzu zyesu tobeni, inga cabota kuti twasyoma lugwasyo ndwapa Leza. Ikuti naa twacita oobo, tulakonzya kulimvwa mbuli mbwaakalimvwa mwaapostolo Paulo walo iwakaamba kuti: “Muzintu zyoonse ndilijisi nguzu kwiinda muli yooyo uundipa nguzu.” (Bafilipi 4:13) Alimwi tuyoocikonzya kwaamba kuti: “Lugwasyo lwangu luzwa kuli Jehova.”—Intembauzyo 121:2.

Ncomukonzya Kucita:

“Jehova wakapa kuti ndileke bukali akuba muntu siluumuno.”—BA WALDO

Amupaile kuli Jehova ikuzwa ansi aamoyo, kulomba muuya wakwe uusalala. (Luka 11:13) Amumulombe kutegwa amugwasye kutondezya bube bwabunaleza mubuumi bwanu. Amwiiye ncolyaamba Bbaibbele kujatikizya bube bukonzya kumugwasya kuzunda lusulo, bube mbuli luyando, luumuno, kukkazika moyo alimwi akulilesya. Mpoonya amujane nzila zyakutondezya bube oobu mubuumi bwanu. Alimwi amuyanzane abantu aabo ibasola kuba abube oobu. Bantu bali boobu balakonzya ‘kumukulwaizya kutondezya luyando akucita milimo mibotu.’—Bahebrayo 10:24.

Cakuluula Icakacitika Ncobeni—BA WALDO

Bakaleka Bukali Alusulo

Ba Waldo bakapenga kapati mubuumi ciindi nobakacili bana calo icakapa kuti babe aalusulo. Bakaamba kuti: “Ndakali kutola lubazu mukulwana abasikusambala misamu iikola . . . Aciindi cimwi kabunga kazigwebenga ikakali kutulwana, kakatuma cigwebenga cimwi kuti cindijaye, pele ndakacikonzya kutija nokuba kuti ndakali acilonda cakuyaswa.”

Ba Waldo tiibakakkomana ciindi bakaintu babo nobakatalika kwiiya Bbaibbele a Bakamboni ba Jehova. Bakaamba kuti: “Tiindakali kubayanda Bakamboni, alimwi ziindi zinji ndakali kubatukila. Pele lyoonse bakali kundiingula kabotu.”

Mukuya kwaciindi, ba Waldo abalo bakatalika kwiiya Bbaibbele. Bakaamba kuti: “Tiicakali cuuba-uba kubelesya zintu nzyondakali kwiiya. Ndakali kubona mbuli kuti tandikacinci.” Pele cintu cimwi ncobakaiya mu Bbaibbele cakabapa kucinca.

Ba Waldo bakaamba kuti: “Bumwi buzuba, ba Alejandro, ibakali kundiyiisya Bbaibbele bakandaambila kubala lugwalo lwa Bagalatiya 5:22, 23. . . . Ba Alejandro bakapandulula kuti kuba abube oobu kwakali kuyandika muuya uusalala wa Leza, ikutali kubelesya nguzu zyangu. Kaambo aaka kamasimpe kakapa kuti ndicince kuyeeya kwangu!”

Kwiinda mugwasyigwa a Leza, ba Waldo bakacikonzya kuleka kusulaika bamwi. Bakaamba kuti: “Babbululu bangu abeenzuma mbondakajisi kaindi balagambwa mbondakacinca.” Alimwi bakayungizya kwaamba kuti: “Jehova wakapa kuti ndileke bukali akuba muntu siluumuno.”