Mibuzyo Yabasikubala

Ino Jesu wakali kupandulula nzi naakaamba kuti: “Mutayeeyi kuti ndakaboola kuleta luumuno”?

Jesu wakaambilizya mulumbe waluumuno. Nokuba boobo, aciindi cimwi wakaambila baapostolo bakwe kuti: “Mutayeeyi kuti ndakaboola kuleta luumuno anyika; ndakaboola kuleta panga ikutali luumuno. Nkaambo ndakaboola kuleta lwaandaano akati kamwana musankwa abausyi, mwana musimbi abanyina, amukamwana abanyinazyala.” (Mt. 10:34, 35) Ino Jesu wakali kupandulula nzi?

Jesu kunyina naakali kuyanda kwaandaanya banamukwasyi, pele wakalizyi kuti njiisyo zyakwe zyakali kukonzya kuwaandaanya mukwasyi. Aboobo, aabo ibasala kuba basikwiiya ba Kristo alimwi akubbapatizyigwa beelede kuzyiba kuti zimwi ziindi banamukwasyi tabakkomani akusala ooku. Zimwi ziindi ngobakwetene limwi naa banamukwasyi bambi buyo balakonzya kubakazya alimwi akupa kuti cibayumine kutobela njiisyo zya Kristo cakusyomeka.

Bbaibbele likulwaizya Banakristo “kukkala muluumuno abantu boonse.” (Rom. 12:18) Pele njiisyo zya Jesu zilakonzya kuba mbuli “panga” mumikwasyi imwi. Eeci cilacitika ciindi munamukwasyi naazumina njiisyo zya Kristo kumwi bamwi nobamukaka naa kumukazya. Kuti caba boobo, banamukwasyi aabo baba “basinkondo” bayooyo iwiiya kasimpe.—Mt. 10:36.

Basikwiiya ba Kristo ibakkala abanamukwasyi ibazulilwa kuzikombelo zimbi, zimwi ziindi beelede kulisalila kukkomanisya Jehova a Jesu naa banamukwasyi. Mucikozyanyo, banamukwasyi batali basyomi balakonzya kubasinikizya kusekelela mapobwe aacikombelo. Kuti caba boobu, nguni ngobayookkomanisya? Jesu wakaamba kuti: “Kufwumbwa muntu uuyandisya bausyi naa banyina kwiinda ndime teelede kuba wangu.” (Mt. 10:37) Masimpe, Jesu taakali kwaamba kuti kutegwa muntu abe sikwiiya wakwe wakeelede kucileka kuyanda bazyali bakwe. Muciindi caboobo, wakali kukankaizya mbociyandika kusala cintu ciyandika kapati mubuumi bwabo. Ikuti banamukwasyi balatukazya notusolekesya kukomba Jehova, tweelede kuzumanana kubayanda, pele tweelede kuzyiba kuti luyando lwesu kuli Leza ncintu ciyandika kapati.

Kakunyina kudooneka, kukazyigwa abanamukwasyi ncintu cicisa kapati. Nokuba boobo, basikwiiya ba Jesu balaayeeya majwi aakwe aakuti: “Kufwumbwa muntu uutazumini kunyamuna cisamu cakwe cakupenzyezya akunditobela, teelede kuba wangu.” (Mt. 10:38) Munzila imwi, Banakristo babona kukazyigwa abanamukwsyi kuti ncibeela camapenzi basikwiiya ba Kristo ngobazumina kuliyumya. Aciindi ncimunya, balijisi bulangizi bwakuti akaambo kakulilemeka kabotu banamukwasyi aabo ibatali basyomi balakonzya kuzumina alimwi akuukkomanina mulumbe wamu Bbaibbele.—1Pet. 3:1, 2.